धनकुटा ,२५ चैत । धरानमा बस दुर्घटना हुदाँ चार जनाको मृत्यु भएको छ । धनकुटाबाट धरान जाँदै गरेको ना ६ ख २७१३ बस धरानको जिरोपोइन्टमा हो ।

धरान १३, जिरोपोइन्टमा भएको दुर्घटनामा परी चालकसहित ४ जनाको मृत्यु भएको इलाका प्रहरी कार्यालय धरानका डिएसपी सुमन तिम्सिनाले बताए। मृतकमध्ये बसका चालक धरान ८ का चक्रबहादुर गुरुङको मात्र पहिचान खुलेको छ ।

अन्य मृत्यु हुनेमा एक बच्चा, एक जना महिला र एक वृद्ध रहेका छन्। उनीहरुको सनाखत हुन बाँकी छ। घाइतेहरुको हाल वीपी प्रतिष्ठानको आकस्मिक कक्षमा उपचार भइरहेको छ। घाइतेहरु ३० भन्दा बढी रहेको अनुमान गरिएको छ ।

ती मध्ये पनि ४ जना गम्भीर छन। प्रहरीका अनुसार केहीको अवस्था ज्यदौ चिन्ताजनक रहेकोले मृतक संख्या अझै बढ्न सक्छ । दुर्घटनामा परेको गाडी धनकुटाको चौबिसे गाउँपालिकास्थित ६ नम्बर बुधबारेबाट धरान आउदै गरेको खुलेको छ।

घाइतेहरुको अनुसार चालकले स्टेरिङलाई निक्कै नियन्त्रण गर्न खोजिरहेका थिए। उनीहरुको वयानबाट बस ब्रेक फेल भएर दुर्घटना भएको प्रहरीको अनुमान छ। आकस्मिक कक्षमा घाइतेहरुको भीड छ। बसभित्र कति यात्रु थिए भन्ने खुलेको छैन । घाइतेहरु धनकुटाको ६ नम्बर बुधबारे, साम्मेवा, राजारानी, ओख्रे, शुक्रबारे क्षेत्रका बढी रहेका छन।