बर्दिया,३ बैशाख । गत आईतबार बर्दियाको गेरुवा(कर्णाली) नदीमा पौडी खेल्ने क्रममा डुबेर बेपत्ता भएका २ जना युवाको शव फेला परेको छ ।

घुम्न जाने क्रममा डुबेर बेपत्ता भएका बाँके कोहोलपुरका १८ वर्षिय दिपेन्द्र कार्की र कैलाली लम्कीका १९ वर्षिय प्रज्वल कोइरालाको शव फेला परेको प्रहरीले जनाएको छ । उनीहरुको शव गोताखोरद्धारा खोजी गर्दा डुबेको स्थानमा फेला परेको हो ।

विदाको समयमा कोठियाघाट घुम्न आएका उनीहरु मधुवन नगरपालिका ३ स्थित कोठियाघाट पुल देखि ५ सय मिटर उत्तर तर्फ पौडी खेल्ने क्रममा गहिरो भागमा पुग्दा डुबेको प्रहरीले जनाएको छ ।

डुबेर बेपत्ता भएको तिन दिन पछि फेला परेको कोठियाघाट प्रहरी चौकीका इन्चार्ज असइ राम बहादुर रानाले बताउनु भयो ।

उनीहरुको शव पोष्टमार्टमका लागि जिल्ला अस्पताल बर्दिया ल्याईदै छ । पोष्टमार्टम पश्चात् शव आफन्तहरुलाई बुझाउने तयारी भईरहेको जिल्ला प्रहरी कार्यालय बर्दियाका प्रहरी नायव उपरीक्षक मदन जित महराले बताउनु भयो ।