बुटवल ७ वैशाख । प्रधानमन्त्री केपी शर्मा ओलीले देशको विकासलाई अवरुद्ध गर्न चाहने तत्वले उपद्रव मच्चाउन ज्योतिष र कथित बाबाहरुको पाउ पर्न थालेको बताउनु भएको छ । भ्रमको खेती गर्नेहरुले धर्मको नाउंमा राजनीतिलाई अल्मल्याउने प्रयास संविधान विरोधी र अपराधपूर्ण दुष्प्रयास भएको प्रम ओलीले बताउनु भयो । राजनीतिक रुपमा देशलाई केही गर्न नसक्ने भएपछि कथित ज्योतिषको पाउ परेर यो वर्ष यस्तो र उस्तो अनिष्ट हुन्छ भन्ने तहमा पुगेकाहरुलाई प्रम ओलीले चेतावनी दिनुभयो

केही दक्षिणाको लोभमा परेर सोझासाझा जनतालाई नअल्मल्याउन समेत ओलीले ज्योतिषहरुलाई सावधान गराउनुभयो ।
ओलीले अहिले सबैको एकमात्र उद्धेश्य विकास र समृद्धिको बाटोमा अघि बढ्नु पर्ने बताउनुभयो ।
रुपन्देहीको जितपुर गढी विजयोत्सव समारोहमा बोल्दै प्रम ओलीले सुशासन कायम गरेर छाड्ने अठोटबाट आफू विचलित नहुने बताउनुभयो ।

कार्यक्रममा बोल्दै प्रदेश ५ सरकारका मुख्यमन्त्री शंकर पोखरेलले जितगढीको समग्र बिकासका लागि स्थानीबासीको सहयोग अपरिहार्य भएको बताउनु भयो । उहांले सबैको सहयोग रहे जितगढी स्वदेश तथा बिदेशी पर्यटकको प्रमुख गन्तब्य बन्ने गरि बिकास गर्न सकिने बताउनु भयो ।
नेकपाका महासचिव तथा रुपन्देही क्षेत्र नम्बर ४ का सांसद बिष्णु पौडेलले बिशेष गुरुयोजना बनाएर जितगढीलाई नेपालीकै पहिचान बनाउन लागिएको जानकारी दिनु भयो ।

यसअघि प्रधानमन्त्री ओलीले तिनाउ खोला किनारमा रहेको जितगढी क्षेत्रमा निर्माण भएको कर्णेल उजीरसिंह थापाको पूर्णकदको शालिकको अनावरण गर्नुभयो । सालिकको छेउमा ४२ फिट उचाइको राष्ट्रिय झण्डाको पनि प्रधानमन्त्री ओलीले झण्डोतोलन समेत गर्नुभयो । विक्रम संवत १८७२ मा नेपाल र अंग्रेजबीच युद्ध हुंदा कर्णेल थापाको नेतृत्वको नेपाली फौज यही किल्लाबाट अंग्रेज फौजलाई परास्त गरेको थियो । नेपाली फौजसंग लडाईं हारेर अंग्रेज फौज दक्षिणतर्फ गएकोले कर्णेल थापाको सालिक दक्षिण तर्फ फर्काएर निर्माण गरिएको छ ।