ल्हासा, १७ वैशाख  । चीनको राजकिय भ्रमणमा रहनुभएकी राष्ट्रपति विद्यादेवी भण्डारी तिब्बत स्वायत्त प्रदेशको राजधानी ल्हासामा विभिन्न कार्यक्रममा व्यस्त हुनुभएको छ ।

राष्ट्रपति भण्डारीसंग केही बेर अघि चिनिया कम्युनिष्ट पार्टीको तिब्बत पार्टी सेक्रेटरीले भेटवार्ता गरेका छन् । भेटमा तिब्बत र नेपालबीच रहंदै आएको हजारौं वर्ष पुरानो सम्बन्धबारे छलफल भएको छ । सीमा क्षेत्रमा बस्ने नेपाली नागरिकलाई सहयोग गर्दै आएकोमा राष्ट्रपतिले पार्टी सेक्रेटरीलाई धन्यवाद दिनुभएको छ ।

सोही अवसरमा तिब्बतको सीमा व्यापार संघ र नेपाली निजी क्षेत्रको व्यवसायिक प्रतिनिधिमण्डलबीच पनि दुईपक्षीय व्यापार वृद्धिबारे छलफल भएको छ । राष्ट्रपति भण्डारीले आज दिउसो नेपाली महावाणिज्य दूतावासको बन्दै गरेको नयां भवनको अवलोकन गर्नुभएको छ । भण्डारी आज बिहान बेइजिङबाट एयर चाइनाको विमान हुंदै ल्हासा पुग्नुभएको हो ।