काठमाडौँ, १० असार । स्वतन्त्र उर्जा उत्पादकको संस्था, नेपाल (इप्पान)ले भारत र बंगलादेशसँग निजी क्षेत्रलाई पनि विद्युत विक्री वितरण गर्न पाउने कानुनी व्यवस्था गर्न सरकारसँग माग गरेको छ ।

इप्पानले मंगलबार काठमाडौंमा पत्रकार सम्मेलन गरी भारत र बंगलादेशसँग निजी क्षेत्रले पनि विद्युत विक्री वितरण गर्न पाउने गरी कानुनी व्यवस्था गर्न उर्जा, जलस्रोत तथा सिंचाई मन्त्रालयसँग माग गरेको हो । इप्पानका अध्यक्ष शैलेन्द्र गुरागाँईले ६ हजार मेघावाट विद्युत उत्पादनको कामलाई अघि बढाएको निजी क्षेत्रलाई पनि भारत, बंगलादेशमा विद्युत विक्री गर्न पाउने व्यवस्था गर्न सरकारसँग माग गरिएको बताउनु भयो ।

इप्पानको टोलीले हालै भारत र बंगलादेशको भ्रमण गरेपछि दुवै मुलुकमा जस्तै नेपालमा पनि निजी क्षेत्रलाई विद्युत विक्री गर्न पाउने कानुनी व्यवस्था गर्न सरकारसँग माग गरेको हो । अध्यक्ष गुरागाईँले नेपालमा विद्युत उत्पादनको अथाह सम्भावना रहेको उल्लेख गर्दै त्यसको बजार व्यवस्थापनका लागि तत्काल क्षेत्रीय बजार स्थापनाका लागि भारत र बंगलादेशसँग पहल गर्न पनि सरकारको गम्भिर ध्यानाकर्षण गराउनु भयो ।

इप्पानले भारत र बंगलादेशसँग विद्युत निर्यात तथा क्षेत्रीय व्यापारका लागि स्पष्ट अवधारणा अघि सार्न पनि सरकारलाई दवाव दिँदै आएको छ ।