काठमाडौं, १२ असार । अहिले काठमाडौं उपत्यकामा मात्र होइन बाहिर पनि ‘सिरिन्ज आक्रमण’को त्रास छ । बनेपाकी ३४ वर्षीया एक युवती सिरिन्ज आक्रमणमा परेको भन्दै बुधबार शुक्रराज ट्रपिकल सेन्टर टेकु आइपुगेकी थिइन् । अस्पतालका निर्देशक डा. पुनका अनुसार अरूभन्दा यो घटना सिरिन्ज एट्याक भनेर दाबी गर्न सकिने छ ।

गएको डेढ महिनामा यस्तै प्रकृतिको घटना लिएर शुक्रराज ट्रपिकल सेन्टरमा ९ जना महिला पुगिसकेका छन् । यसअघि भएका चार घटना सार्वजनिक भएपछि त्रसित हुँदै महिलाहरु टेकु अस्पताल पुगेका डा. पुन बताउँछन् । उनीहरुलाई एचआईभी विरुद्धको एआरटी औषधि चलाइएको छ भने हेपाटाइटिस बी बिरुद्धको भ्याक्सिन पनि दिइएको छ । केही दिनको अन्तरमा भएको उस्तै घटनाले महिलाहरु त्रसित छन् ।

पछिल्लो तथ्यांकले सिरिन्ज आक्रमण घटनाको ग्राफ बढेको देखाउँछ । तर प्रहरीले भने आक्रमणकारी पक्राउ नभएकाले घटनाबारे थप भन्न नसकिने बताएको छ । डा. पुनले पनि आक्रमण रोग सार्ने नियत हो या आतंक फैलाउने नियतले हो थाहा भइनसकेको बताउँछन् । उनका अनुसार पीडित महिलाहरूमा कुनै संक्रमण भए/नभए टुंगो लाग्न तीन महिनासम्म कुर्नुपर्छ । भन्छन्, ‘तीन महिनाअघि नै घटनाको बारेमा थाहा पाउन आक्रमणकारी पक्राउ गरेर अनुसन्धान गर्नुपर्छ ।’

टेकु अस्पतालका चिकित्सकहरुले पनि घटनालाई ‘गम्भीर’ रूपमा लिएका छन् । यद्यपि सिरिन्जले घोपेको भनेर दाबी गर्न सक्ने पर्याप्त आधारहरु अझै नभेटेको डा। पुन बताउँछन् । उनी भन्छन्, ‘अधिकांश युवतीको दाबी मान्ने हो भने सिरिन्ज आक्रमण नै भएको हो, तर बनेपाको घटना बाहेक अरुमा अन्यौलमा छौं ।’

सिरिन्ज आक्रमणका पछिल्ला ९ मध्ये ६ वटा घटनाबारे प्रहरीमा उजुरी परिसकेको छ । गएका एक सातामा भएका ५ वटा घटनापछि प्रहरीले अनुसन्धान तीव्र बनाएको छ । महानगरीय प्रहरी परिसर, काठमाडौंका प्रवक्ता डीएसपी होविन्द्र वोगटी आक्रमणकारीको पहिचान गर्न सीसीटीभी फुटेज र पीडितको बयानका आधारमा खोजी भइरहेको बताउँछन् । बोगटी भन्छन्, ‘हामी आक्रमणकारी खोजिरहेका छौं । चाँडै सार्वजनिक गर्छौं ।’

टेकुस्थित शुक्रराज ट्रपिकल सेन्टरका डा। अनुप बास्तोलाका अनुसार सिरिन्ज नै आक्रमण गरेको हो भनेर दाबी गर्न नसकिने ३ कारणहरु । यस्ता छन् ।

पहिलो कारण– स्पिडमा बाइकमा आएर घोप्दा घोपिएको ठाउँ वरपर घर्षण भएर चोट देखिन सक्छ तर चारैजना युवतीको घोपिएको ठाउँमा एक ठाउँमा मात्र चोट देखिन्छ ।

दोस्रो कारण– घटना भएको स्थानको सीसीटीभी फुटेजमा मोटरसाइकल युवतीको नजिकबाट गएको देखिन्छ, तर हातमा भएको वस्तु सिरिन्जजस्तो देखिँदैन ।

तेस्रो कारण– सिरिन्जले घोप्दा चोट गहिरोसँग लाग्छ, तर बनेपाको बाहेक अन्य युवतीको घोपेको ठाउँमा चोट गहिरो छैन । घाउ ठूलो छ । जसको कारण काँटी या कुनै धारिलो हतियारले आक्रमण गरेको अनुमान गर्न सकिन्छ ।

एउटै प्रकृतिको घटना एकै समयमा र एउटै क्षेत्रमा भएकाले सिरिन्ज हुन सक्नेमा पनि उनी सहमत छन् । सिरिन्ज हो या होइन भनेर थाहा पाउन आक्रमणकारीको नियत थाहा पाउनुपर्ने उनी बताउँछन् ।