काठमाडौं, १७ असार । कागेश्वरी मनोहरा नगरपालिका–२ आलापोटका ज्येष्ठ नागरिकलाई मधुमेह, उच्च रक्तचाप र दमको औषधि निःशुल्क उपलब्ध गराइने भएको छ ।

नगरपालिकाको–२ र आलापोट स्वास्थ्य चौकीले आज संयुक्त रुपमा आयोजना गरेको ज्येष्ठ नागरिक सम्मान, ज्येष्ठ नागरिक, अशक्त र अपाङ्गका लागि निःशुल्क स्वास्थ्य शिविर एवं औषधि वितरण कार्यक्रममा यस्तो जानकारी गराइएको हो ।

शिविरमा ७० वर्ष माथिका १७० जना ज्येष्ठ नागरिकको स्वास्थ्य परीक्षण गरी एक महीनाका लागि निःशुल्क औषधि वितरण गरिएको स्वास्थ्य चौकी प्रमुख स्वास्थ्य सहायक ९हेल्थ असिस्टेन्ट० जगत नेपालीले राससलाई जानकारी दिनुभयो ।

ज्येष्ठ नागरिकलाई निःशुल्क औषधि वितरण गर्न वडा नं।–२ कार्यालय रु ८५ हजार उपलब्ध गराएको पनि उहाँले बताउनुभयो । शिविरमा नेपाल मेडिकल कलेज अत्तरखेलका अस्पताल उपनिर्देशक डा प्रकाशराज पौडेलको नेतृत्वमा पाँच जना चिकित्सकको समूह सक्रिय थियो ।

कार्यक्रमलाई सम्बोधन गर्नुहुँदै नगरप्रमुख कृष्णहरि थापाले ज्येष्ठ नागरिकलाई स्वास्थ्य चौकीबाटै सबै सेवा उपलब्ध गराउन नगरपालिकाले आवश्यक साधन र स्रोत उपलब्ध गराउने प्रतिबद्धता जनाउनुभयो । वडाध्यक्ष सुदर्शन धिमालले वडाभरका ज्येष्ठ नागरिकलाई वर्षभर मधुमेह, उच्च रक्तचाप र दमको औषधि निःशुल्क उपलब्ध गराइने प्रतिबद्धता जनाउनुभयो । आगामी आर्थिक वर्षदेखि ज्येष्ठ नागरिकलाई ल्याब र भिडियो एक्स–रे सेवासमेत निःशुल्क दिन बजेटको व्यवस्था गरिने घोषणा गर्नुभयो ।

रेबिज भ्याक्सिन खरीद गरेर भए पनि स्वास्थ्य चौकीबाट निःशुल्क सेवा दिने वडा कार्यालयले जनाएको छ । आलापोट स्वास्थ्य चौकीमा विसं २०७५ जेठ २४ गते ‘बर्थिङ सेन्टर’ उद्घाटन भएको थियो । गत वर्ष असार १७ गते नै पहिलो पटक ‘बर्थिङ’ गराएको वार्षिकोत्सवका अवसरमा आज कार्यक्रम गरिएको हो ।

हालसम्म स्वास्थ्य चौकीमा ५८ जना महिलाले प्रसूति सेवा लिएको प्रमुख नेपालीले जानकारी दिनुभयो । स्वास्थ्य चौकीमा राम्रो स्वास्थ्य सेवा पाइने भएपछि टाढा टाढाका बिरामी पनि आलापोटमा धाउने गरेका छन् ।