धनगढी , ६ साउन । कैलालीमा छोराले आफ्नै बुवाको धारिलो हतियार प्रयोग गरी हत्या गरेका छन् । आक्रमणबाट आमा गम्भीर घाइते भएकी छन् ।

घोडाघोडी नगरपालिका–११, मा ५५ वर्षीय छोरा उदे रावतले आइतबार राति धारिलो हतियार हसिया प्रहार गरी ७५ वर्षीय बावु काल्चे रावतको हत्या गरेको जिल्ला प्रहरी कार्यालयले जनाएको छ ।
छोराको आक्रमणबाट बाबुलाई जोगाउन आएकी आमा नन्दे रावतमाथि पनि उदेले धारिलो हतियार प्रहार गरेका छन् । आक्रमणबाट उनी गम्भीर घाइते भएकी छन् । इलाका प्रहरी कार्यालय, सुखडका प्रहरी निरीक्षक यक्षराज जोशीका अनुसार उनलाई उपचारका लागि नेपालगञ्ज लगिएको छ । घरायसी विवादमा छोराले आफ्नै बुवा तथा आमामाथि धारिलो हतियार प्रहार गरेको प्रारम्भिक अनुसन्धाननाट खुलेको प्रहरीले जानकारी दिएको छ । हत्या गरी फरार रहेका उदे रावतलाई आइतबार राति नै पक्राउ गरी घटनाबारे थप अनुसन्धान भइरहेको प्रहरीले जनाएको छ ।