बझाङ्, ८ साउन ।  बझाङ्गमा आर्थिक वर्ष २०७५/७६ मा ५५ करोड ४० लाख रकम फ्रिज भएको छ । कोष तथा लेखा नियन्त्रण कार्यालय बझाङले जनाएको छ ।
जिल्लामा गएको आर्थिक वर्षको चालू खर्च तर्फ ३९ करोड ६९ लाख ९७ हजार ८७३ र पुँजीगततर्फ १५ करोड ७० लाख १७ हजार ५८७ रुपयाँ फ्रिज भएको कोष तथा लेखा नियन्त्रक शेरबहादुर विष्टले बताए ।

संघीय सरकार र प्रदेश सरकारबाट निकासा भएको चालूतर्फ ४ अर्ब ९५ करोड ७४ लाख १६ हजार ३०३ बजेट रहेको थियो । गत आर्थिक वर्षको पुँजीगततर्फको खर्च प्रतिशत हेर्दा ८० दशमलव ४९ प्रतिशत खर्च भएको छ भने चालूतर्फको खर्च ९२ दशमलव ५९ प्रतिशत खर्च भएको हो ।

दुई नगरपालिका र १० गाउँपालिका रहेको यस जिल्लामा स्थानीय तहले पनि काम गर्न नसकेर रकम फ्रिज गरेका छन् । तल्कोट गाउँपालिकाले ३८ लाख ९३ हजार ४१८ फ्रिज गरेको छ भने बुंगल नगरपालिकाबाट ३ करोड २५ लाख २० हजार, सुर्मा गाउँपालिकाबाट १३ लाख ६ हजार ६ सय , केदारस्यँु गाउँपालिकाबाट ३ करोड १२ लाख ७४ हजार ६५४ रकम फ्रिज भएको छ ।

यसका साथै थलारा गाउँपालिकाबाट २ करोड ८३ लाख ५८ हजार ८२४, बित्थड चिर गाउँपालिकाबाट २४ लाख ९३ हजार ७८८, दुर्गाथली गाउँपालिकाबाट ७४ लाख ६५ हजार ६ सय, खप्तडछान्ना गाउँपालिकाबाट ३ करोड ५८ लाख ५७ हजार २२३, जयपृथ्वी नगरपालिकाबाट २ करोड ४८ लाख ७ हजार ३३३ रकम फ्रिज भएको छ ।

साथै मष्टा गाउँपालिकाबाट ३२ लाख २५ हजार, साइपाल गाउँपालिकाबाट ८९ लाख ८५ हजार ६२९ र छबिसपाथीभेरा गाउँपालिकाबाट ३ करोड १० लाख ३१ हजार ९३३ रकम पनि फ्रिज भएको कोष तथा लेखा नियन्त्रक कार्यालय बझाङले जानकारी दिएको छ ।

जिल्लामा प्रायः जसो रकम ढिला निकासा भएका कारण खर्च गर्न नसकेको जनाएको छ । राज्यको पुनः संरचना भएर स्थानीय तह भएपछि बझाङ जिल्लामा सरकारको आउने बजेट बढेको बताउँदै कोष नियन्त्रक विष्टले खर्चअनुसार उपलब्धि देखाउनतिर अब सबैको ध्यान जान जरुरी भएको बताए ।

जिल्लामा रहेका १२ वटै स्थानीय तह अन्य सरकारी कार्यालयको निकासा तथा खर्चको विवरण कोष तथा लेखा नियन्त्रण कार्यालयमा हुने भए पनि केही जिल्लाबाहिर रहेका डिभिजन कार्यालयबाट निकासा भएको रकमको जिल्लामा अभिलेख छैन ।

यसका साथै गैरसरकारी संस्थामा निकासा खर्चको विवरण कोष तथा लेखा नियन्त्रक कार्यालयमा नहुने हुँदा वर्षभरि सरकारी गैरसरकारी निजी क्षेत्र र रेमिट्यान्सको रकम हेर्दा झन्डै १२ अर्ब जति रकम बझाङमा परिचालन हुने गरेको अनुमान गरिएको छ ।