काठमाडौं, ९ साउन । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्डले भदौ महिनादेखि देशव्यापी अभियानमा जाने घोषणा गर्नुभएको छ ।

नेकपाका संस्थापक नेता नरबहादुर कर्माचार्यको स्मृति दिवसको अवसरमा आयोजित कार्यक्रमलाई धुम्बाराहीमा सम्बोधन गर्दै प्रचण्डले साउन महिनाभित्र नै पार्टीको सचिवालय र स्थायी कमिटी बैठक बसेर देशैभर अभियान सञ्चालन गर्ने घोषणा गर्नुभएको हो । सरकारका कामलाई प्रभावकारी पार्दै पार्टीलाई आम नागरिकका समस्या समाधानमा केन्द्रित गर्ने उद्देश्यले देशैभर अभियान सञ्चालन गर्ने थालेको अध्यक्ष प्रचण्डले बताउनुभयो ।

त्यसका लागि साउन महिनाभित्रै पार्टीको सचिवालय र स्थायी समिति बैठक बस्ने समेत अक्ष्यक्ष प्रचण्डले बताउनुभयो ।पार्टी एकतालाई अन्तिम रुप दिने र सरकारलाई प्रभावकारी पार्नेगरी अहिले पार्टीमा छलफल चलिरहेको भन्दै प्रचण्डले नयाँ मोडलको समाजवादको अभ्यास देशलाई मात्र नभएर विदेशीलाई समेत देखाउनेगरी काम गर्नुपर्नेमा जोड दिएका छन् ।