बझाङ, २८ साउन । भगवतीका सोह्र शक्तिरुपहरूमध्ये एक सुर्मादेवीको धार्मिक,तथा ऐतिहासिक धरोहरको पर्व बिरीजात मेला बिहिवारदेखी सुरु भएको छ । बझाङको सुर्मा गाँउपालीकामा पर्ने यो मेला ५ दिन सम्म चल्ने गदर्छ । श्रावण शुक्ल पक्षको एकादशी बाट सुरु भएर जनै पूर्णिमाका दिन समापन हुने मेला भर्न तीर्थ यात्रीहरू बिहीबार देखी सुर्मा सरोवरतिर प्रस्थान गरेका छन् ।

तीर्थालु भत्तजनहरुले शुक्लपक्ष एकादशीका दिन,जयपृथ्वी नगरपालिकाको सेलाखेत ,बारील, धम्नाउ, छविस पाथीभेरे गाँउपालीकाको मुम्लामा, रहेको सुर्मा मन्दिरमा पूजा आजा गरी सुर्मा सरोवरको यात्रामा निस्कने गर्छन् । त्रियोदशीका दिन बिहान सुर्मा सरोवरमा स्नान गरी पूजाआजा गर्ने र त्यसको भोलिपल्ट त्यहाँबाट फर्केर सुर्मा गाउँपालिकाकाको थकुन्डा गाउँ नजीकै रहेको सुर्मा देवीको मुख्य मन्दिरमा धुमधामसँग पूजा गरेपछि मेला समापन हुने गर्दछ ।

सुर्मा सरोबर जान कुनै पनि ब्यक्तीले जुत्ता चप्पल लगाउन नपाईने, पानी पर्दा छाता ओड्न समेत नपाईने परम्मरा अहिले पनि कायमै रहेको जयपृथ्वी नगरपालीका वडा नम्बर ८ का वडा अध्यक्ष नवराज कोईरालाले बताए उनले भने मेला अवधिभर यहाँका कुनै पनि स्थानीय बासिन्दाहरुले माछा मासु, लशुन प्याज समेत नखाने परम्परा छ ।