बाँके , १३ भदौ ।  बाँकेको नेपालगञ्ज उपमहानगरपालिकाले शहरलाई गाउँसँग जोड्नको लागि बस सेवा सञ्चालन गर्ने भएको छ । त्यसका लागि उपमहानगरपालिकाले ७ वटा बसहरु खरिद गरिसकेको छ । केही महिनाअघि नै बस खरिद गरिसकेको उपमहानगरपालिकाले केही दिनमा नै बस सेवाको सुरुवात गर्ने जनाएको छ ।

अहिले भर्खरै नै नगर बस किन्ने उपमहानगरपालिकाको योजना रहेको थिएन । उपमहानगरले लक्षित गरेको वर्गको उत्थानका लागि केन्द्रसँग पैसा मागिएको थियो । तर, माग गरिएको मध्ये ५ करोड रकम आर्थिक वर्षको अन्तिममा आएपछि त्यसलाई कसरी खर्च गर्ने बहसको विषय बन्यो ।

लक्षित वर्गलाई बिना धितोमा ऋण दिन पनि प्रक्रिया लामो हुने र प्रक्रियामा जादा जादै पैसा फिर्ता गर्नुपर्ने अवस्था आउने भएको भन्दै त्यही रकमबाट उपमहानगरपालिकाले नगर बस खरिद गर्न लागेको छ । खरिद गरिएका सात वटा नगर बसले केही दिनदेखि गाउँ–शहरलाई जोड्ने बताइएको छ । तीन करोड ४५ लाख ५० हजार ७ सयमा खरिद गरिएका सात वटा बसको आम्दानी लक्षित वर्गकै उत्थानका लागि खर्च गरिने मेयर डाक्टर धवलशमशेर राणाले जानकारी दिए । विगतमा पनि नगर साझेदारी कार्यक्रम प्रभावकारी भएकाले बसमा लक्षित वर्गबाट कर्मचारी राख्ने र आम्दानी नगर साझेदारी शीर्षकमा राख्ने निर्णय गरेर अघि बढाएको मेयर राणाले बताए ।

नगर बसलाई व्यवस्थित रुपमा सञ्चालन गर्नका लागि कार्यविधि समेत बनाइएको छ । एकजना यात्रु भए पनि बस गन्तव्यसम्म पुग्ने उपमहानगरपालिकाले जनाएको छ । काठमाडौंको साझा बस जसरी नै नगर बस सञ्चालनमा गर्ने तयारी गरिएको छ । लक्षित वर्गबाट चालक र सहचालक लिइएको छ । तत्काललाई महिला सहचालकको रुपमा रहेने छन् । बस चलाउन सक्ने भएपछि महिलालाई नै चालक बनाउने रणनीति लिइएको उपमहानगरपालिकाका प्रमुख प्रशासकिय अधिकृत हरी प्याकुरेलले बताए । सीटभन्दा बढी यात्रु नराख्ने, जेष्ठ नागरिक, अपाङ्ता, विद्यार्थीलाई सहुलियत दिइने प्याकुरेलले जानकारी दिए ।

नेपालगञ्जदेखि कोहलपुर, खजुरा, गौघाट, कम्दी, बेतहनीलगायतलाई रुट बनाउने तयारी भएको छ । अहिलेसम्म यी ठाउँमा बस सञ्चालनमा छैनन् । विभिन्न नामका यातायात व्यवसायीहरुले फाट्टफुट्ट माइक्रोबस सञ्चालनमा ल्याएका छन् । महानगरको अभियानमा लम्केको नेपालगञ्जलाई गाउँ–शहर जोड्ने यस अभियानले कस्तो नतिजा दिन्छ त्यो हेर्न केही महिना त कुर्नेपर्छ ।