काठमाडौं, २६ पुस । नेत्रविक्रम चन्द नेतृत्वको प्रतिबन्धित नेकपा पोलिटब्युरो सदस्य मोहन कार्की सत्तारुढ नेपाल कम्युनिष्ट पार्टी (नेकपा)मा प्रवेश गर्नुभएको छ । नेकपा केन्द्रीय कार्यालय धुम्बाराहीमा शनिबार बिहान आयोजित एक कार्यक्रमबीच उहालाई अध्यक्ष पुष्पकमल दाहाल प्रचण्डले पार्टी प्रवेश गराउनु भएको हो ।

चन्द समूहका कार्कीलगायत नेता, कार्यकतालाई प्रचण्ड दाहालले पार्टीमा स्वागत गर्नुभएको थियो । प्रचण्डसँगै महासचिव विष्णु पौडेल, नेताहरु देवेन्द्र पौडल, अग्नि सापकोटा, हितमान शाक्यलगायतले पनि स्वागत गर्नुभयो ।
पार्टी प्रवेश कार्यक्रमलाई सम्बोधन गर्दै अध्यक्ष प्रचण्डले कार्की केही समय यताउता अलमलिएर पनि मूलधर फर्किएकोमा खुसी व्यक्त गर्नुभयो । कार्कीले जनयुद्धका समयमा उपत्यकामा बसेर जनयुद्ध कुनै आतंक होइन भन्ने कुरा जनतालाई बुझाउन योगदान गरेको स्मरण गराउदै विप्लव पनि ढिलोचाँडो नेकपामा आउने दाबी गर्नुभयो ।

चन्द समूहमा रहेकै बेला २०७५ साल चैत १ गते ललितपुरबाट पक्राउ परेका कार्की २०७६ साउन २१ गते रिहा हुनु भएको थियो । उहालाई अभद्र व्यवहारसम्बन्धी आरोप लगाइए पनि काठमाडौंका प्रमुख जिल्ला अधिकारीले छाड्ने आदेश दिएपछि थुनामुक्त हुनु भएको थियो ।

चन्द समूहमाथि प्रतिबन्ध लगाएपछि कार्की लगायत थुप्रै उच्चस्तरका नेता पक्राउ परेका थिए । तर पक्राउपछि रिहा हुने कार्की उच्चस्तरका पहिलो नेता समेत हुनुहुन्छ । कार्कीले चन्द समूहबाट क्रान्ति पार नलाग्ने बताउँदै आफू नेकपामा प्रवेश गरेको बताउनु भयो ।