काठमाडौं, १६ चैत । नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले चिनियाँ राष्ट्रपति सी जिनपिङसँग कोरोना भाइरसको महामारीसँग जुध्न आवश्यक सहयोगका लागि अपिल गर्नूभएको छ ।

नेकपाको तर्फबाट बिहीबार चैत १३ गते राष्ट्रपति सीलाई एक विशेष पत्र लेख्दै अध्यक्ष प्रचण्डले उपरोक्त आग्रह गर्नु भएको हो । महामारीविरुद्ध जुध्न अत्यावश्यक मेडिकल इक्युपमेन्टलगायत अन्य सामग्रीको जरुरत रहेको बताउँदै अध्यक्ष प्रचण्डले चाँडोभन्दा चाँडो आवश्यक सामग्री पठाइदिन अनुरोध गरेको प्रेस संयोजक विष्णु सापकोटाले जानकारी दिनुभयो ।

यो स्थितिमा चीनले नेपाललाई गर्ने सहयोगप्रति नेपाली जनता आभारी हुने बताउँदै अध्यक्ष प्रचण्डले कोरोना भाइरसको प्रभाव चीनमा समाप्त भएर जनजीवन सामान्य हुँदै गएकोमा बधाईसमेत दिनुभएको छ । कोरोना भाइरस चीनको वुहान सहरबाट सुरु भएको मानिएको छ । पछि यसलाई विश्व स्वास्थ्य संगठनले कोभिड–१९ नाम दिएको थियो ।

कोरोना भाइरसबाट चीनमा ८१ हजार मानिस संक्रमित भएका थिए । तीमध्ये तीन हजार तीन सयको मृत्यु भएको छ । विश्वभर यो महामारीबाट अहिलेसम्म ३१ हजार भन्दा बढिले मानिसको ज्यान गएको छ ।

आइतबार मात्रै चीनले चीनले कोरोना भाइरसको संक्रमण रोकथाम एवं उपचारमा प्रयोग हुने व्यक्तिगत सुरक्षा सामग्री, मास्कलगायतका सामान नेपाल सरकारलाई हस्तान्तरण गरेको थियो । नेपालका लागि चिनियाँ राजदूत होउ यान्छीले आइतबार स्वास्थ्य तथा जनसंख्या मन्त्रालय पुगी ती सामान स्वास्थ्य तथा जनसंख्यामन्त्री भानुभक्त ढकाललाई हस्तान्तरण गर्नुभएको छ ।