बुटवल, १७ चैत्र ।
प्रदेश ५ अन्तर्गतका सिमाको दशगजामा अलपत्र परेका नेपालीहरुलाई प्रदेश सरकारले उद्दार गरेर घर पठाउने भएको छ । प्रदेश सरकारको मन्त्री परिषदको बैठकले आज उनीहरुलाई गांउ सम्म पु¥याउने निर्णय गरेको हो । उद्दार गरिएकाहरुलाई स्थानीय पालिकाले अनिवार्य क्वारेन्टायनमा राख्नु पर्ने र खानपानको ब्यवस्था समेत गर्नुपर्ने मन्त्री परिषदले निर्णय गरेको छ ।
आज मध्यान्ह बसेको मन्त्री परिषदको बैठकले निमार्ण क्षेत्रमा काम गर्ने मजदुरलाई घर पठाउने व्यवस्था गर्ने, खेती स्याहार्ने बेला भएकाले कृषि प्रयोजनमा प्रयोग हुने थ्रेसर, कम्बाइन मेशिन लगायत गाउँ र नगरपालिकाभित्र कार्यकारी अधिकृतले तथा जिल्लाभित्र र बाहिरका लागि प्रमुख जिल्ला अधिकारीले पासको व्यवस्था मिलाउने गरि ब्यवस्था गर्ने गरि निर्णय गरेको छ ।
मन्त्री परिषदको निर्णय सार्वजानिक गर्दै प्रदेश ५ का मुख्यमन्त्री शंकर पोखरेलका प्रेस संयोजक शेरबहादुर केसीले एम्बुलेन्स चालकका लागि १२ वटै जिल्ला प्रशासन कार्यालयमा पिपिई पठाइएको र एम्बुलेन्स चालकलाई पिपिई उपलब्ध गराउने काम प्रमुख जिल्ला अधिकारीलाई जिम्मा दिईएको बताउनु भयो ।
चीनबाट आएका कोभिड १९ परिक्षणको प्रयोगशाला प्रदेशको ३ स्थानमा स्थापना गर्ने समेत मन्त्री परिषदले निर्णय गरेको छ । निर्णयमा उक्त प्रयोगशाला रुपन्देहीको भैरहवाको गहुँ बाली अनुसन्धान केन्द्र परिसरमा, दाङको राप्ती स्वास्थ्य विज्ञान प्रतिष्ठानमा र नेपालगञ्जको भेरी अस्पतालमा स्थापना गरी कोरोना भाइरसको परीक्षण शुरु गर्ने उल्लेख गरिएको छ।