काठमाडौं, ४ बैशाख  ।  दक्षिण एशियाका देशहरूमध्ये कोरोनाभाइरसका सङ्क्रमितको सङ्ख्या सबैभन्दा धेरै भारतमा देखिएको छ । त्यहाँ अहिलेसम्म १२ हजार ३ सय ७० जना सङ्क्रमित भएका छन् भने ४२२ जनाको मृत्यु भइसकेको छ। दक्षिण एशियाली राष्ट्रहरुमध्ये भारत कोरोना भाइरसको प्रकोपबाट सबैभन्दा बढी प्रभावित भएको छ ।

पछिल्लो २४ घण्टामा भारतमा ९,१८ नयाँ सङ्क्रमित देखिएका छन् भने ३४ जनाको मृत्यु भइसकेको छ । भारतपछि कोरोनाभाइरसबाट सङ्क्रमित हुनेको सङ्ख्या पाकिस्तानमा धेरै देखिएको छ ।

पछिल्लो तथ्याङ्क अनुसार पाकिस्तामा त्यहाँ ६ हजार ३ सय ८३ जना सङ्क्रमित भएका छन् भने १११ जनाको मृत्यु भइसकेको छ। पाकिस्तानका प्रधानमन्त्री इमरान खानले कोरोनाभाइरसको महामारीका कारण अर्थतन्त्रमा नराम्ररी उतारचढाव आएको भन्दै विकासोन्मुख देशलाई तत्काल ऋण सहुलियत दिन अपिल गरेका छन्।

दक्षिण एशियाका देशहरूमध्ये कोरोनाभाइरसबाट असर र्पुयाएको तेस्रो देश बाङ्लादेश हो। त्यहाँ अहिलेसम्म १२ सय ३१ जना सङ्क्रमित भएका छन् भने ३४ जनाको मृत्यु भएको छ । ४९ जना निको भएका छन् । नेपालमा हाल सम्म १७ जना संक्रमित रहेका छन् भने १ जना उपचारपछि निको भएका छन् । यस्तै अफगानिस्तानमा पनि कोरोनाको प्रभाव बढ्दै गएको छ । हालसम्म २१ जनाले कोरोनाको संक्रमणबाट ज्यान गुमाएको अफगानिस्तानमा ७ सय ४८ जना कोरोनाबाट संक्रमित बनेका छन भने २५ जनाले ज्यान गुमाएका छन् । श्रीलंकामा अहिलेसम्म २ सय १४ जनामा कोरोना भाइरसको संक्रमण पुष्टि भएको छ भने ७ जनाले ज्यान गुमाएका छन्।

अन्य तीन देश माल्दिभ्स, नेपाल र भुटानमा भने हालसम्म कोरोना भाइरसको संक्रमणबाट कसैको पनि मृत्यु भएको छैन । माल्दिभ्समा हालसम्म २० जनामा कोरोना भाइरसको संक्रमण देखिएको छ । यस्तै नेपालमा १७ जना र भुटानमा ५ जनामा कोरोना भाइरसको संक्रमण देखिएको छ।