काठमाडौं, २७ जेठ । विश्वभर महामारीको रुपमा फैलिएको कोरोना भाइरसबाट अमेरिकामा दैनिक मृत्यु हुनेको संख्या दैनिक घट्दो क्रममा रहेको छ ।

केहिदिनअघिसम्म कोरोना भाइरसबाट दैनिक २ हजार देखि २५ सयसम्म मानिसको मृत्यु भएको अमेरिकामा अहिले यो दर ६ सयको हाराहारीमा झरेको छ।

हिजो सोमबार ३७३ जनाको मृत्यु भएको अमेरिकामा मंगलबार विहान यो समाचार तयार पार्दासम्म पछिल्लो २४ घण्टामा त्यहाँ कोरोनाकै कारण मृत्यु हुनेको संख्या ५८६ छ । पछिल्लो २४ घण्टामा १९ हजार ११ जना संक्रमित थपिएका छन् । योसँगै त्यहाँ संक्रमित हुनेको संख्या २० लाख २६ हजार ४६० पुगेको छ ।

कोरोना भाइरसको महामारीले अमेरिकामा मंगलबारसम्म १ लाख १३ हजार ५५ जनाको मृत्यु भएको छ । कुल संक्रमितमध्ये ७ लाख ७३ हजार ४३५  जना संक्रमणमुक्त भएका छन् । उपचार गराइरहेका ११ लाख ४० हजार ९२७ जनामध्ये १६ हजार ९०४ जनाको अवस्था गम्भीर रहेको छ ।