काठमाडौं, ५ असार । शुक्रवार सत्तारूढ नेपाल कम्युनिष्ट पार्टी (नेकपा) र चिनियाँ कम्युनिष्ट पार्टी (सिपिसी) बीच भिडियो कन्फेरेन्स शुरु भएको छ ।

पार्टी कार्यालय धुम्बाराहीमा शुरु भएकोे भिडियो संवादमा नेकपाका अध्यक्ष पुष्पकमल दाहाल ‘प्रचण्ड’ र उपप्रधान एवम् रक्षामन्त्री ईश्वर पोखरेलसहित करिव सयको हाराहारीमा नेकपाका नेताहरुको उपस्थिती रहेको छ ।

कोभिड–१९ महामारीका कारण प्रत्यक्ष रूपमा अन्तरक्रिया हुन नसक्ने भएकाले भिडियोमार्फत् बेइजिङबाट यो कार्यशाला सञ्चालन गर्न गरिएको हो । नेपाल कम्युनिष्ट पार्टी केन्द्रीय पार्टी स्कूल विभाग, चिनिया कम्युनिष्ट पार्टी अन्तर्राष्ट्रिय विभाग, चिनिया“ कम्युनिष्ट पार्टी तिब्बत स्वशासित क्षेत्र कमिटीको संयुक्त संयोजनमा कार्यशाला निश्चित गरिएको हो ।

बेइजिङस्थित चिनिया“ कम्युनिष्ट पार्टी, अन्तर्राष्ट्रिय विभागका नेताहरूले नेपालका कम्युनिष्ट नेताहरूलाई आफ्ना अनुभव प्रस्तुत गर्नुका साथै सुशासनका लागि पार्टीको अनुशासन, भ्रष्टाचार विरूद्धको शून्य सहनशीलता, समसामयिक विश्व परिस्थितिलगायतका विषयमा प्रशिक्षण दिने बताइएको छ ।

भिडियो अन्तरक्रियामा नेपालका तर्फबाट नेपाल कम्युनिष्ट पार्टीका अध्यक्ष पुष्पकमल दाहाल प्रचण्ड, उपप्रधान एवं रक्षामन्त्री ईश्वर पोखरेल लगायत १ सय भन्दा बढी उच्चस्तरीय नेताहरू सहभागी हुनुहुन्छ । नेताहरूलाई चिनिया कम्युनिष्ट पार्टीका अन्तर्राष्ट्रिय विभागका प्रमुख सोङ थाओलगायत नेताहरूले प्रशिक्षित गर्ने जनाइएको छ । यसअघि गत वर्ष असोजमा दुवै देशका पार्टीको संयुक्त पहलमा काठमाडौंमा दुई दिने विचार गोष्ठी गरिएको थियो ।