काठमाडौँ, १२ असार । सत्तारुढ नेकपाको जारी स्थायी कमिटी बैठकमा भारतसँगको सीमा विवादका विषयमा छलफल भइरहेको छ । पर्यटनमन्त्री एवं नेकपा स्थायी कमिटी सदस्य योगेश भट्टराईले बैठकमा दुई देशबीचको सीमा समस्याबारे छलफल भइरहेको जानकारी दिनुभयो ।

नेता भट्टराईका अनुसार सबै सदस्यहरुले छिमेकी भारतसँग प्रभावकारी ढंगले वार्ता गरेर अतिक्रमित भूमि फिर्ता ल्याउनुपर्नेमा जोड दिएका छन् । बैठकमा आफ्ना धारणा राख्ने नेताहरुले डुबान र सीमा क्षेत्रमा हुने आपराधिक गतिविधि नियन्त्रणका लागि भारतसँग सरकारले प्रभावकारी वार्ता गर्नुपर्ने सुझाव दिएका छन् ।

बैठकमा परराष्ट्रमन्त्री रहेका स्थायी कमिटी सदस्य प्रदीप ज्ञवालीले सन् १८१६ देखिका सन्धि सम्झौतासहित नेपालले आफ्नो भूमि फिर्ता ल्याउनका लागि अहिलेसम्म गरेका सबै प्रयासबारे बैठकमा जानकारी गराउनु भएको थियो । उहाले नोभेम्बर, डिसेम्बर र जनवरी गरी तीन पटकसम्म वार्ताको प्रस्ताव गर्दा पनि भारतले कुनै रेस्पोन्स नगरेको जानकारी दिएको नेता भट्टराईले बताउनुभयो ।

पछिल्लो समय कोभिड–१९ को महामारी कम भएपछि वार्तामा बस्ने विभिन्न अनौपचारिक फोरमहरुबाट जानकारी आएको बैठकमा ज्ञवालीले बैठकलाई जानकारी गराउनु भएको छ । उहाले वार्तामार्फत सीमा समस्या समाधान गरिनुपर्ने भए पनि भारतले वास्ता नगरेको बताउनु भयो ।