जाजरकोट, २ पुस।  मध्यपहाडी लोकमार्गअन्तर्गत जाजरकोटखण्डको निर्माण शुरु भएकोे आठ वर्ष बिते पनि अझैसम्म काम पूरा हुन सकेको छैन ।

लोकमार्गको जाजरकोटखण्डको ८२ किमीमध्ये पाँच किमी सडक मार्ग खोल्न अझै बाँकी छ । थलहबजारस्थित छेडागार खोलामा पुल निर्माण नहुँदा लोकमार्ग अधुरो बनेको हो ।

रुकुमको चौरजहारी, दैलेखको सुयाँडासम्मको जाजरकोट खण्डमा छेडागारलगायत खोला तथा खोल्सामा पुल निर्माण नगरिएको स्थानीयवासीको गुनासो छ ।

थलबजारमा पुल निर्माण र मन्ताभिर, कालढुंगा, चुवादेउली भिर, भुसखोलालगायतका स्थानमा बाटो खुला नहुँदा सडक निर्माण कार्य अलपत्र परेको छ ।

त्यस्तै चौरजहारी र कुदुबीचमा पर्ने भेरी पुल र झुप्राखोला पुल निर्माणमा भएको ढिलाइले पनि लोकमार्ग निर्माणलाई थप अधुुरो बनाएको हो । मध्यपहाडी लोकमार्ग पश्चिमखण्ड आयोजना दाङ शाखाले भने अधुरो सडकखण्डको मार्ग खोल्ने कार्य पूरा भएको प्रतिवेदन दुई वर्षअघि नै सडक विभागमा बुझाएको थियो ।

जाजरकोटका बासिन्दाले लोकमार्गको यस खण्डको छिटोभन्दा छिटो बाटो निर्माण गरेर यातायात सञ्चालन गर्न माग गरेका छन् । एकैसाथ शुरु भएको लोकमार्गको दैलेख र रुकुमखण्डमा दुई वर्षअघि नै यातायात सञ्चालन भएको दशेराका रामबहादुर थापाले बताउनुभयो । जाजरकोट खण्ड निर्माणको जिम्मा लिएका कतिपय व्यवसायीले कार्य पूरा नगर्दै भुक्तानी लिँदा सडक निर्माण अलपत्र परेको स्थानीयवासीको गुनासो छ ।

मन्ताभिर खण्डको निर्माण जिम्मा लिएको दिव्यज्योति निर्माण सेवाले कडा चट्टान भन्दै निर्माण पूरा गर्न नसकेको डिभिजन इन्जिनियर शुभराज न्यौपानेले बताउनुभयो ।

त्यस्तै धनञ्जय र सिद्धार्थ जेभीले पनि काँडा झाप्राखण्डको कालढुंगा भिर निर्माण भएको छैन “यस मार्गको मन्ताभिर र काँडा झाप्राखण्ड निर्माणको जिम्मा लिएका व्यवसायीले कार्य पूरा नगरेरै भुक्तानी लिएको देखियो”, उहाँले भन्नुभयो, “कालढुंगा र मन्ताभिरको ५०० मिटर कडा चट्टान नखोलेरै ठेक्का रकम भुक्तानी भएछ ।”

पछिल्लो समय मन्ताभिर खोल्न तयार नभएका व्यवसायीेले विगतमा कामै नगरी ठेक्का होल्ड गरी बसेकाले जाजरकोटखण्ड निर्माणमा ढिलाइ भएको इन्जिनियर न्यौपानेले बताउनुभयो ।