काठमाडौं, १७ फागुन । नेपाल कम्युनिष्ट पार्टी (नेकपा ) अध्यक्ष पुष्पकमल दाहाल प्रचण्डले देशमा नैतिकताको खडेरी देखिएको बताउनुभयो । सोमबार काठमाडौंमा आयोजित पेशागत महासंघ नेपाल र नेपाल राष्ट्रिय कर्मचारी महासंघको एकता घोषणा कार्यक्रममा बोल्दै प्रचण्डलेसर्वोच्च अदालतले संसद् विघटनलाई बदर गरिदिँदा ओलीले नैतिकताको आधारमा राजीनामा नदिएर अझै धम्की र अहंकार प्रदर्शन गरेको बताउनुभयो । ‘देशमा नैतिकताको खडेरी परेको देखियो । संविधानमाथि घात भयो, असंवैधानिक भनेर देशव्यापी आन्दोलन भयो, सर्वोच्चले फैसला गर्‍यो । नैतिकताको आधारमा एक रौं पनि केही गर्न नपर्ने । अझ उल्टै धम्कि, अहंकार प्रदर्शन गर्ने । पुरै ध्वस्त नभएसम्म केपिजीको बुद्धि पलाउने देखिएन,’ अध्यक्ष प्रचण्डले भन्नुभयो। उहाँले आधिकारिक नेकपा र सूर्य चिह्नआफूहरुले पाउने पक्का भएको दाबी समेत गर्नुभएको छ । कार्यक्रममा प्रचण्डले निर्वाचन आयोगले आफूहरुलाई नै आधिकारिक नेकपा पार्टी र सूर्य चिह्नदिने पक्का भइसकेको खबर आफूले पाएको बताउनुभो ।संविधान, राजनीतिक दल सम्बन्धी ऐन र अन्य प्रावधानका आधारमा आफूहरु नै आधिकारिक भएको कुरा निर्वाचन आयोगले पुष्टि गर्न लागेको प्रचण्डको दाबी छ । प्रधानमन्त्री केपी शर्मा ओलीले अदालतमा सेटिङ गर्न खोजे पनि उहाँको षड्यन्त्र सर्वोच्चले असफल बनाइदिएको र निर्वाचन आयोगले पनि ओलीको सेटिङलाई भत्काइदिने प्रचण्डको जिकिर छ ।

संसद विघटनको मुद्दामा सर्वोच्च अदालतको फैसलाले ओली समूहलाई नराम्ररी पछारिदिएको र हारको झोंकमा जे पायो त्यै भन्दै हिँडेको प्रचण्डको आरोप छ । सर्वोच्चको फैसलापछि प्रधानमन्त्री ओलीले लाज मान्नुपर्नेमा उल्टै बलियो भएँ भन्दै हिँडेकोमा प्रचण्डले आश्चर्य व्यक्त गर्नुभएको छ ।