काठमाडौं, १३ पुस । जनता समाजवादी पार्टी (जसपा)  को संसदीय दलको नेतामा रामसहायप्रसाद यादव निर्विरोध चयन भएका छन्।संसदीय दलको नेतामा दाबी गर्दै आएका अशोक राई पछि हटेपछि उनी निर्विरोध निर्वाचित भएको सांसद नवलकिसोर साहले जानकारी दिए।

‘रामसहाय यादवको मात्रै मनोनयन दर्ता भएकोले उहाँ निर्विरोध चयन हुनुभयो,’ साहले भने।यादव जसपा अध्यक्ष उपेन्द्र यादवका विश्वास पात्र हुन्। उनी बारा २ बाट निर्वाचित भएका थिए।उनलाई संसदीय दलको नेता बनाउन अध्यक्ष यादवले पहल गरिरहेका थिए।

बुधबार पनि सांसदहरूलाई टेलिफोन गरेर यादवलाई निर्विरोध नेता चयनमा सघाउन अध्यक्ष उपेन्द्रले आग्रह गरेका थिए।प्रतिनिधिसभामा जसपाका १२ सांसद छन्। जसपाले नेकपा माओवादी केन्द्रका अध्यक्ष पुष्पकमल दाहाल नेतृत्वमा रहेको अहिलेको सरकारलाई समर्थन गरे पनि सरकारमा सहभागी भने भएको छैन।