काठमाडौँ । पृथ्वी जयन्तीको अवसरमा राप्रपाले काठमाडौंको भृकुटीमण्डपमा जलपान कार्यक्रम गरेको छ । कार्यक्रममा राप्रपाका नेता कार्यकर्ताका साथै विभिन्न दलका नेताहरू तथा नेपालस्थित विदेशी कुटनैतिक नियोगका पदाधिकारी सहभागी भएका छन् ।  जलपान कार्यक्रममा सर्वसाधारण, नेता, कार्यकर्ताका लागि र विशिष्ट पाहुनाका लागि फरक फरक चियापानको व्यवस्था गरिएको छ । जलपानको व्यवस्थापन अर्पण व्याङ्केटले लिएको छ ।

झण्डै ३ हजार जनाका लागि जलपानको व्यवस्था गरिएपनि झण्डै ४ हजार सहभागी भएको व्याङ्केटका सिईओ शिवकुमार सरावगीले रातोपाटीलाई जानकारी दिए । सर्वसाधारणका लागि सालको पातको दुनामा लड्डु, निम्कि, समोसा, पकौडा चिया र पानीको व्यवस्था गरिएको छ ।  यस्तै भिआइपी पाहुनाका लागि स्यान्डबीच, कटलेट, गुलाव जामुन, फ्रेन्च फ्राईड,  कुकिज चिया, कफिको व्यवस्था गरिएको छ । भिआइपी करिब ५ सय जनाका लागि जलपानको व्यवस्था गरिएको छ ।

जलपानका लागि ६५ जना ३ दिनदेखि खटिएको सरावगीले जानकारी दिए ।  निम्की र लड्डु बनाउनका लागि ३ दिनदेखि ७२ जनाले काम गरेका र ३ दिनका लागि १५० जनाले काम गरको उनले बताए ।  पकौडा र समोसा भृकुटीमणडपमै बनाईएको हो भने लड्डु र निम्की भने अर्पण व्याङकेटमै तयार पारिएको हो ।  यस्तै राप्रपाले गरेको जलपान कार्यक्रममा रक्तदान कार्यक्रम, कविता वाचन कार्यक्रम, सांस्कृतिक झाँक्री प्रर्दशनको कार्यक्रम पनि गरिएको छ ।