काठमाडौँ, २० चैत । रियल मड्रिडले स्पेनिस ला लिगामा रियल भालाडोलिडमाथि फराकिलो जित हासिल गरेको छ ।

कप्तान करिम बेन्जेमाले पहिलो हाफमै ८ मिनेटको अन्तरमा ह्याट्रिक पूरा गरेको खेलमा मड्रिडले घरेलु मैदानमा ६–० को फराकिलो जित हासिल गरेको हो ।

सान्टियागो बर्नबेउमा आइतबार राति भएको खेलको २२औँ मिनेटमा रोड्रिगोले रियलको जितका लागि खाता खोलेका थिए । त्यसपछि कप्तान बेन्जेमाले २९औं, ३२औँ र ३६औँ मिनेटमा निरन्तर गोल गरेर कप्तान बेन्जेमाले ह्याट्रिक गरेर पहिलो हाफमा नै ४–० को अन्तरले खेललाई अघि बढाए ।  यो हयाट्रिक उनले ८ मिनेटको अन्तरमा गरेका थिए ।

त्यसैगरी दोस्रो हाफको ६५औँ मिनेटमा रोड्रिगोले गरेको गोलले भिएआरबाट मान्यता नपाए पनि ७३औँ मिनेटमा मार्को एसेन्सियोले गोल गर्दै रियललाई ५–० ले अघि बढाए भने त्यसपछि इन्ज्युरी समयको पहिलो मिनेटमा लुकास भास्क्वेजले थप गोल गर्दै रियललाई ६–० को सानदार र ठुलो अन्तरको जित दिलाए ।

यस जितसँगै मड्रिडले शीर्ष स्थानको बार्सिलोनासँगको दुरी १२ अंकमा छोट्याएको छ । दोस्रो स्थानमा रहेको मड्रिडको २ठ खेलबाट ५९ अंक पुगेको छ । समान खेलबाट शीर्ष स्थानको बार्सिलोनाको ७१ अंक छ । पराजित भालाडोलिड २८ अंक जोडेर १६औँ स्थानमा छ ।