काठमाडौं । रसुवाको भोटेकोशी नदीमा तिब्बततर्फबाट ठूलो बाढी प्रवेश गरेको छ। बाढीका कारण त्रिशूली नदीको बहावसमेत बढ्न सक्ने सम्भावना रहेकाले नदी तटीय क्षेत्रमा उच्च सतर्कता अपनाउन आग्रह गरिएको छ।

नेपाल प्रहरीले अर्को सूचना जारी नभएसम्म त्रिशूली नदीको तटीय क्षेत्रमा बसोबास गर्ने नुवाकोट, धादिङ, चितवन, गोरखालगायत जिल्लाका बासिन्दालाई उच्च सतर्कता अपनाउन र सम्भावित जोखिमबाट बच्न सुरक्षित स्थानमा रहन अनुरोध गरेको छ।

भोटेकोशीमा आएको बाढी त्रिशूली नदीमा मिसिँदा नदी आसपासका क्षेत्रमा जोखिम बढ्न सक्ने भएकाले नदी किनारमा नजान तथा स्थानीय प्रशासन र सुरक्षा निकायले जारी गरेका सूचना पालना गर्न प्रहरीले आग्रह गरेको छ।

नदी किनारमा नजान आग्रह

तिब्बततर्फबाट आएको ठूलो बाढी भोटेकोशी हुँदै त्रिशूलीमा मिसिन सक्ने भएकाले तटीय क्षेत्रको जोखिम बढेको हो। सम्भावित बाढी तथा कटानबाट हुन सक्ने क्षति न्यूनीकरण गर्न स्थानीयवासीलाई विशेष सावधानी अपनाउन भनिएको छ।

बाढीका कारण भएको क्षति तथा अन्य अवस्थाबारे विस्तृत विवरण आउन बाँकी रहेको प्रहरीले जनाएको छ।

Originally published on abcnews.com.np.