रसुवा । बुधबार बिहान लेन्दे खोला अर्थात् भोटेकोशीमा आएको भीषण बाढीले रसुवा जिल्लाको उत्तरी क्षेत्र तहसनहस बनाएको छ। बाढीले टिमुरेसहित दुईवटा बजार क्षेत्र पूर्ण रूपमा ध्वस्त बनाउनुका साथै रसुवा भन्सार क्षेत्रका सवारीसाधन, मालसामान तथा अन्य संरचनासमेत बगाएको स्थानीय प्रशासनले जनाएको छ।

रसुवाका सहायक प्रमुख जिल्ला अधिकारी ध्रुवप्रसाद अधिकारीका अनुसार बाढीले रसुवा नाका क्षेत्रमा व्यापक मानवीय तथा भौतिक क्षति पुर्‍याएको छ।

उनले भने, “दुईवटा बजार पूरै तहसनहस भएका छन्। रसुवा भन्सार क्षेत्रमा धेरै गाडी र सामान थिए, ती सबै बाढीमा बगे।”

बजार र भन्सार कार्यालयमा व्यापक क्षति

बाढीको चपेटामा परेको टिमुरे बजार तथा आसपासका व्यापारिक क्षेत्र व्यापक रूपमा क्षतिग्रस्त भएका छन्। प्रशासनका अनुसार बाढीले बजार क्षेत्रसँगै रसुवा भन्सार कार्यालय र त्यहाँ रहेका विभिन्न संरचनामा पनि ठूलो क्षति पुर्‍याएको छ।

भन्सार क्षेत्रमा रहेका मालवाहक तथा अन्य सवारीसाधन, व्यापारिक सामान र उपकरण बाढीले बगाएको बताइएको छ। बाढीपछि स्थानीय बासिन्दा त्रसित बनेका छन् भने प्रभावित क्षेत्रको जनजीवन अस्तव्यस्त भएको छ।

नयाँ पुलसमेत बाढीले बगायो

गत वर्षको बाढीबाट क्षति पुगेपछि हालै निर्माण सम्पन्न गरिएको नयाँ पुल पनि यसपटकको बाढीले बगाएको छ।

पुल बगेसँगै प्रभावित क्षेत्रको यातायात सम्पर्क गम्भीर रूपमा प्रभावित भएको छ। बाढीले सडक तथा अन्य पूर्वाधारमा समेत क्षति पुर्‍याएकाले उद्धार र राहत कार्यमा समेत चुनौती थपिएको छ।

राहत र पुनर्निर्माणको चुनौती

स्थानीय प्रशासनले प्रभावित क्षेत्रमा तत्काल राहत सामग्री उपलब्ध गराउन आवश्यक सहयोगको आग्रह गरेको छ। साथै, बाढीबाट भएको मानवीय तथा भौतिक क्षतिको विस्तृत विवरण संकलन गर्ने काम भइरहेको जनाएको छ।

गत वर्ष पनि यस क्षेत्रमा आएको बाढीले ठूलो क्षति पुर्‍याएको थियो। पटक–पटक दोहोरिँदै आएको बाढीले सीमावर्ती व्यापारिक केन्द्र, सडक, पुल तथा भन्सार पूर्वाधारमा क्षति पुर्‍याउँदै आएकाले यसपटकको विपत्तिपछि पुनर्निर्माणसँगै दीर्घकालीन रूपमा बाढी जोखिम न्यूनीकरण गर्ने चुनौतीथपिएको छ।

Originally published on abcnews.com.np.