काठमाडौँ, २६ वैशाख । नेपाल प्रहरीले नक्कली भुटानी शरणार्थी प्रकरणमा पक्राउ परेकाहरूले पोलेका व्यक्तिहरूलाई बयानका लागि मंगलबार बोलाइएको छ ।
बयानका लागि काठमाडौँ जिल्ला प्रहरी परिसरले थप जनशक्तिसहितको छुट्टै टोली बनाएको छ ।
पक्राउ परेका आरोपीहरूले बयानका क्रममा नाम लिएका उच्च तहका व्यक्तिहरूको बयान लिने तयारी प्रहरीले गरेको छ ।
पक्राउ परेका बिचौलियाहरूले नेपाली कांग्रेस नेता एवम् पूर्वगृहमन्त्री बालकृष्ण खाण, उनकी पत्नी मञ्जु खाण र कांग्रेस सभापति शेरबहादुर देउवाकी पत्नी आरजु राणा देउवासम्मको नाम लिएको सार्वजनिक भएको छ ।
बिचौलियाहरूले बयानका क्रममा आफ्नो बयान जस्ताको तस्तै राख्न र उच्च तहका व्यक्तिहरूलाई पनि अनुसन्धान नगरे आत्मदाह गर्नेसम्मको धम्की दिएपछि प्रहरीले राजनीतिक व्यक्तिहरूलाई बयानका लागि बोलाएको हो ।
पक्राउ पुर्जीका लागि पर्याप्त प्रमाण नपुगेको भन्दै बयानबाट प्रक्रिया सुरू गर्ने प्रहरीले जनाएको छ । मञ्जु र आरजुले समेत रकम बुझेको अडियो सार्वजनिक भएपछि प्रहरीले यो प्रकरणमा थप प्रमाण संकलनको काम पनि सँगसँगै गरिरहेको छ ।
यही प्रकरणका कारण प्रहरी महानिरीक्षक बसन्तबहादुर कुँवरको अमेरिका भ्रमण स्थगित भएको छ ।
प्रतिक्रिया दिनुहोस्