काठमाडौँ, २६ वैशाख । नक्कली भुटानी शरणार्थी प्रकरणमा मुछिएका नेकपा (एमाले)का सचिव एवम् पूर्वमन्त्री टोपबहादुर रायमाझीलाई पक्राउ गर्न जिल्ला परिसर काठमाडौँले देशभरका प्रहरी निकायमा पत्राचार गरेको छ ।

काठमाडौँ जिल्ला आदालतले पक्राउ पुर्जी जारी गरेपछि रायमाझी फरार भएका छन् । रायमाझीको खोजी गर्न केन्द्रीय अनुसन्धान ब्युरोको टोली पनि परिचालन गरिएको छ ।

गत बुधबार पक्राउ पुर्जी जारी भएपछि रायमाझीले काठमाडौँ पुगेर अनुसन्धानमा सहयोग गर्ने प्रतिक्रिया दिएका थिए । तर, त्यसै साँझदेखि उनी मोबाइल बन्द गरेर भागेका हुन् । प्रहरी महानिरीक्षक बसन्त कुँवरलाई नै फोन गरेर आफैँ उपस्थित हुने बताएपछि उनलाई पक्राउ गर्न खटिएको प्रहरी पनि फिर्ता भएको थियो ।

काठमाडौँ प्रहरी परिसरले रायमाझीलाई बुटवलबाटै पक्राउ गर्ने तयारी थियो । तर, काठमाडौँ ओर्लिनासाथ पक्राउ गर्ने बुझेपछि रायमाझी साँझबाट सम्पर्कविहीन भएका थिए । उनका छोरा सन्दीपलाई भने प्रहरीले बुटवलबाट त्यसैदिन पक्राउ गरेको थियो ।

पूर्वगृहमन्त्री रामबहादुर थापाका सुरक्षा सल्लाहकार इन्द्रजित राई, पूर्वगृहसचिव टेकनारायण पाण्डे, केशव दुलाल, सानु भण्डारी, सन्देश शर्मा, सागर राई र टंक गुरूङ पनि थुनामा छन् ।

यसैगरी, पूर्वगृहमन्त्री बालकृष्ण खाणलाई प्रहरीले आवश्यक परेको बेला उपस्थित हुने कागज गराएर छोडेको छ । सोमबार अपरान्ह काठमाडौँ प्रहरी परिसरमा पुगेका खाडलाई आवश्यक परेको बेला बयानका लागि उपस्थित हुने कागज गराइएको प्रहरीले जनाएको छ ।

खाणले आफू अनुसन्धानमा सहयोग गर्न तयार रहेको बताएको पनि प्रहरीले जनाएको छ ।