काठमाडौं, ८ असोज । नेपाली कांग्रेसका केन्द्रीय सदस्यहरूले नै दुई महिनामा केन्द्रीय समिति बैठक बस्ने विधानको व्यवस्था अव्यावहारिक भएको भन्दै विधान सच्याउन माग गरेका छन् ।

केन्द्रीय समितिको बैठक एक वर्षमा गत साउनमा बसेर पुनः दुई महिनामा पहिलोपटक बसेकोमा केन्द्रीय सदस्यहरूले नियमित बैठकको सान्दर्भिकतामा प्रश्न उठाएका हुन् ।

“सभापतिज्यू हाम्रो विधानले त दुई–दुई महिनामा केन्द्रीय समिति बैठक बस्ने व्यवस्था गरेको छ । तर, यो व्यवस्था व्यावहारिक छैन,” केन्द्रीय सदस्य डा। नारायण खड्काले भने, “काठमाडौं बस्नेहरूका लागि त ठिकै हो । काठमाडौं बाहिर बस्नेहरूका लागि हवाई टिकटसहितको खर्चका हिसाबले यो व्यावहारिक छैन । विधानको व्यवस्था संशोधन गरी वर्षमा तीन वा चारवटा मात्र बैठक बस्ने व्यवस्था गर्न जरुरी छ ।

बैठकमा अर्का केन्द्रीय सदस्य रमेश रिजालले पनि दुई–दुई महिनामा बैठक बस्ने कुरा व्यावहारिक नभएको बताए । बैठकका लागि एजेण्डासमेत नराखी बैठक बस्नुपरेको भन्दै बिना एजेण्डाका बैठकको अर्थ नहुने उनको भनाइ थियो ।

“सभापतिज्यू यो दुई–दुई महिनामा बैठक बस्ने कुरा व्यावहारिक भएन । बिना एजेण्डामा बस्ने बैठक र यसमा हुने छलफलको अर्थ हुँदैन,” रिजालले भने, “अब विधान नै संशोधन गर्नुपर्छ भनेपनि गरौँ । आवश्यक परे जहिले पनि केन्द्रीय समिति बैठक बस्न सकिन्छ ।”