काठमाडौं, १९ कात्तिक । गएको शुक्रबारको भूकम्पपछि जाजरकोटमा निरन्तर परकम्प मापन गरिएको छ । आइतबार बिहान १० बजेर ३५ मिनेटसम्म जाजरकोटमा ३११ परकम्प मापन गरिएको राष्ट्रिय भूकम्प मापन तथा अनुसन्धान केन्द्रको सुर्खेतस्थित कार्यालयले जानकारी गराएको छ ।

यीमध्ये चार म्याग्निच्युडदेखि माथिका ६ परकम्प मापन गरिएको सो कार्यालयका प्रमुख बलबहादुर तामाङले जानकारी दिए ।

शुक्रबार राति ११ बजेर ४७ मिनेटमा जाजरकोटको रामीडाँडा आसपास केन्द्रविन्दु भएर ६।४ म्याग्निच्युडको भूकम्प गएको थियो । सो भूकम्पका कारण भौतिक संरचना भत्कँदा जाजरकोट र रुकुम पश्चिममा ठूलो जनधनको क्षति भएको छ ।

चार म्याग्निच्युडदेखि माथिका ६ परकम्पमध्ये ‘ठूलो’ शनिबार बिहान ४ बजेर १६ मिनेटमा रामीडाँडा आसपास नै केन्द्रविन्दु भएको ४।६ म्याग्निच्युडको धक्का रहेको उनले बताए ।

केन्द्रका अनुसार ६।४ म्याग्निच्युडको भूकम्पपछि शुक्रबारै राति १२ बजेर ८ मिनेटमा रामीडाँडा आसपास नै केन्द्रविन्दु भएको ४।५, सोही राति १२ बजेर २९ मिनेटमा जाजरकोटमै ४।२, शुक्रबारै राति १२ बजेर ३५ मिनेटमा जाजरकोटमै ४।३ म्याग्निच्युडको परकम्प मापन गरिएको थियो ।

यस्तै, जाजरकोटमै शनिबार बिहान ४ बजेर १६ मिनेटमा ४।६ र शनिबार दिउँसो ३ बजेर ४० मिनेटमा रामीडाँडा आसपास नै केन्द्रविन्दु भएको ४।२ र आइतबार बिहान १ बजेर २२ मिनेटमा जाजरकोटमै ४ म्याग्निच्युड परकम्प मापन गरिएको केन्द्रले जनाएको छ । केन्द्रका अनुसार मुख्य भूकम्पपछि सो क्षेत्रका सबै धक्का परकम्प हुन् ।

भूकम्प मापन केन्द्र सुर्खेतका कार्यालय प्रमुख तामाङका अनुसार पछिल्लो एक वर्षमा पश्चिम नेपालमा चार ‘मझौला भूकम्प’ गएको छ । ६ देखि ७ म्याग्निच्युडसम्मका धक्कालाई मझौला भूकम्प भनिने उनले बताए । ७ देखि ८ भन्दा मुनिलाई ठूला र ८ म्याग्निच्युडदेखि माथिका धक्कालाई महाभूकम्प भनिने उनले जानकारी दिए ।

गत वर्ष कात्तिक २२ गते डोटी केन्द्रविन्दु भएको ६।६ म्याग्निच्युडसहित एक वर्षको अवधिमा पश्चिम नेपालमा चार मझौला भूकम्प गएको उनले बताए । तिनका थुप्रै परकम्प मापन भइसकेको छ ।

“२०७९ कात्तिक २२ गते डोटीमा ६।६ म्याग्निच्युडको भूकम्प गएको थियो । त्योदेखि जाजरकोटको ६।४ म्याग्निच्युडको भूकम्पसम्म पश्चिम नेपालमा चारवटा मझौला भूकम्प गएको छ,