काठमाडौं, भदौ १४ गते । लाङटाङ हिमालको एक भागमा गएको पहिरोका कारण चीनको केरुङनजिकै बनेको कृत्रिम ताल प्राकृतिक रूपमा बगेर पूर्ण रूपमा खाली भएको चीनको जलस्रोत मन्त्रालयले जनाएको छ।

नेपालको छोछेन खोला र चीनको पुरेपु साङ्पो नदीको संगमस्थलनजिकै बनेको उक्त तालमा बिहीबार बिहानसम्म करिब २० लाख घनमिटर पानी सञ्चित रहेको अनुमान गरिएको थियो।

मन्त्रालयका अनुसार शनिबार बिहान पुरेपु साङ्पो नदीमा बनेको तालको सतहको क्षेत्रफल करिब ९९ हजार वर्गमिटर थियो। यो क्षेत्रफल करिब १४ वटा फुटबल मैदान बराबर रहेको बताइएको थियो। बिहीबार खिचिएको भूउपग्रह तस्बिरको तुलनामा तालको आकार घट्दै गएको पाइएको थियो।

प्राकृतिक स्रोत मन्त्रालयको भूगर्भीय विपद् प्राविधिक मार्गदर्शन केन्द्रका वरिष्ठ इन्जिनियर चेन होङछीका अनुसार तालको क्षेत्रफल एक लाख २० हजार वर्गमिटरभन्दा बढी रहेको अनुमान गरिए पनि यसको गहिराइ भने तत्काल यकिन हुन सकेको थिएन।

यसअघि विज्ञ तथा अधिकारीहरूले हिमनदीको भग्नावशेषबाट बनेको उक्त ताल फुटेमा तल्लो तटीय क्षेत्रमा दोस्रो ठूलो विपत्ति निम्तिन सक्ने चेतावनी दिएका थिए। यस्तो सम्भावित जोखिमले नेपालतर्फ भइरहेको खोज तथा उद्धार कार्यसमेत प्रभावित हुनसक्ने भन्दै उच्च सतर्कता अपनाइएको थियो।

बुधबार गएको हिमनदी पहिरोपछि चट्टान, हिउँ, लेदो तथा अन्य भग्नावशेषसहितको भीषण बाढी हिमाली नदी प्रणालीमा मिसिएको थियो। बाढीका कारण नेपाल–चीन सीमामा रहेको केरुङतर्फको नाका तथा आसपासका संरचनामा समेत ठूलो क्षति पुगेको थियो।

यस विपत्तिबाट नेपालमा ठूलो मानवीय क्षति भएको छ। ७०० भन्दा बढीको मृत्यु भएको र हजारौँ व्यक्ति बेपत्ता रहेको जनाइएको छ।

Originally published on abcnews.com.np.