काठमाडौं १२ माघ । सम्बन्ध सुधारको प्रयास गरिरहेका अमेरिका र चीनका वरिष्ठ अधिकारीहरुबीच थाइल्यान्डमा गुप्त वार्ता हुने भएको छ। अमेरिकी राष्ट्रिय सुरक्षा सल्लाहकार जेक सलिभान र चिनियाँ विदेशमन्त्री वाङ यीबीच वार्ता हुन लागेको हो।

नोभेम्बरमा सान फ्रान्सिस्कोमा राष्ट्रपति जो बाइडेन र सी चिनफिङबीच भएको वार्तापछि सलिभान र वाङ पहिलोपटक भेट्न लागेका हुन्।

बेलुन काण्ड र ताइवानका विषयमा तनाव उत्कर्षमा पुगेपछि गतवर्षको अन्त्यमा अमेरिकी र चिनियाँ अधिकारीहरुले सम्बन्ध सुधारको प्रयास थालेका थिए। त्यसका लागि सलिभान र वाङबीच गुप्त रुपमा अस्ट्रियाको भियना र माल्टामा भेट भएको थियो।

जसले नोभेम्बरमा बाइडेन र सीबीचको भेटलाई सम्भव तुल्याएको थियो।  अमेरिकी अधिकारीहरु सञ्चारमाध्यमको नजरबाट टाढा निजी रुपमा वार्ता भएकाले सलिभान–वाङ संयन्त्र प्रभावकारी बनेको बताउँछन्।

पछिल्लो समय लाल सागरमा पश्चिमा जहाजहरुलाई आवागमनमा बाधा गरिरहेको हुथी समूहलाई रोक्न इरानमाथि दबाब बढाउन अमेरिकाले चीनलाई आग्रह गरिरहेको छ। यो विषय सलिभानले हालै अमेरिका भ्रमणमा गएका चिनियाँ कम्युनिस्ट पार्टीका अन्तर्राष्ट्रिय विभाग प्रमुख लिउ च्यानचाओसँग पनि उठाएका थिए। जो वाङको उत्तराधिकारीका रुपमा विदेशमन्त्री बन्ने कतिपयको आकलन छ।

विदेशमन्त्ती रहेका छिन काङ बर्खास्त भएपछि गत जुलाईयता वाङले चिनियाँ विदेश मन्त्रालय र चीनको शीर्ष कूटनीतिज्ञ दुवैको भूमिका निर्वाह गरिरहेका छन्।

अमेरिका र चीनबीच ताइवान विवादित विषय बन्ने गरेको छ, जहाँ हालैको चुनावमा अमेरिकाको समर्थन प्राप्त उम्मेदवार लाइ चिङ ते विजय भएका छन्। फाइनान्सियल टाइम्स