मस्को । क्रेमलिनका प्रवक्ता दिमित्री पेस्कोभले युक्रेनमा उत्तर एटलान्टिक सन्धि संगठन (नेटो) सदस्य राष्ट्रका सैनिक तैनाथ गर्नु रुसका लागि अस्वीकार्य रहेको बताएका छन्।

मंगलबार सञ्चारकर्मीसँग कुरा गर्दै पेस्कोभले युक्रेनमा विदेशी सैनिक तैनाथ गर्ने विषयमा रुसले विभिन्न तहबाट आफ्नो धारणा स्पष्ट पारिसकेको बताए।

गत सोमबार ‘कोएलिसन अफ द विलिङ’का नेताहरूले युक्रेनको स्वतन्त्रताको ३५औँ वार्षिकोत्सवका अवसरमा किएभमा भर्चुअल बैठक गरेका थिए। बैठकमा बेलायतका प्रधानमन्त्री एन्डी बर्नहम, फ्रान्सका राष्ट्रपति इमानुएल म्याक्रोन, जर्मन चान्सलर फ्रेडरिक मर्ज र युक्रेनी राष्ट्रपति भोलोदिमिर जेलेन्स्कीसहितका नेताको सहभागिता थियो।

गठबन्धनले जारी गरेको विज्ञप्तिमा रुस र युक्रेनबीच विश्वसनीय युद्धविराम भएपछि युक्रेनमा तैनाथ गर्ने प्रस्तावित ‘मल्टिनेसनल फोर्स युक्रेन’ को तयारीलाई निरन्तरता दिने उल्लेख गरिएको छ।

‘रुसको विजय अवश्यम्भावी’

पेस्कोभले रुस आफ्नो विजयप्रति विश्वस्त रहेको बताएका छन्। शान्तिपूर्ण समाधानका लागि आवश्यक परिस्थिति तयार नभएसम्म रुसले युक्रेनमा सैन्य कारबाही जारी राख्ने उनको भनाइ छ।

‘हामी विजयको आशा मात्र गरिरहेका छैनौँ, यो अवश्यम्भावी छ भन्नेमा विश्वस्त छौँ,’ पेस्कोभले भने।

युक्रेनमा युद्धविराम तथा विदेशी सैनिकको सम्भावित तैनाथीबारे पश्चिमी मुलुक र रुसबीचको मतभेद कायमै रहेका बेला क्रेमलिनको पछिल्लो धारणा सार्वजनिक भएको हो।

Originally published on abcnews.com.np.