काठमाडौं २१ फागुन । २०७९ को आम निर्वाचनपछि तेस्रो पटक सत्ता गठबन्धन फेरबदल हुँदैछ । गत वर्ष पुस १० मा एमाले, राप्रपा, रास्वपासहितका दलको समर्थनमा प्रधानमन्त्री बनेका पुष्पकमल दाहाल ‘प्रचण्ड’ ६४ दिनमात्र उक्त गठबन्धनको साथ रहे ।

त्यसपछि कांग्रेस, नेकपा एकीकृत समाजवादीसहितको गठबन्धनमा फर्किएका उनी एक वर्ष बित्नासाथ फेरि एमालेतिर ढल्किएका छन् ।

सत्ता समीकरणमा फेरबदलका क्रममा एउटा अनौठो संयोग दोहोरिएको छ । दुवै पटक सत्ता समीकरण फेरबदल हुँदा परराष्ट्रमन्त्रीको आसन्न विदेश भ्रमण रद्द गरिएको छ ।

२०७९ फागुन १४ गते आइतबार तत्कालीन परराष्ट्रमन्त्री विमला राई पौड्याल जेनेभा जाने तयारीमा रहँदा उनको भ्रमण अचानक रद्द गरिएको थियो । त्यतिबेला प्रधानमन्त्रीको निर्देशन भन्दै तत्कालीन मुख्यसचिव शंकरदास वैरागीले पौड्याललाई विमानस्थलबाट फिर्ता बोलाएका थिए ।

अहिले सत्ता गठबन्धन फेरबदलको रस्साकसीका बिच परराष्ट्रमन्त्री एनपी साउदको आसन्न फिनल्याण्ड भ्रमण रद्द भएको छ । विशेष परिस्थितिका कारण मन्त्री साउद पूर्वनिर्धारित कार्यक्रम अनुसार फिनल्याण्ड भ्रमणमा जान नसकेको मन्त्रालयले जनाएको छ ।

उल्लेखनीय छ, गत वर्ष फागुनमै सत्ता समीकरण फेरबदल भएको थियो । अहिले फागुनमै फेरि सत्ता समीकरणमा फेरबदलको तयारी भइरहेको छ ।