काठमाडौं २ साउन । वरिष्ठ अधिवक्ता रमेश बडाल महान्यायाधिवक्ता नियुक्त हुने भएका छन्। प्रधानमन्त्री केपी शर्मा ओलीले बडाललाई दोस्रोपटक महान्यायाधिवक्ता नियुक्त गर्न लागेका हुन्।

‘बडालले अरूलाई महान्यायाधिवक्तामा नियुक्त गर्दा पनि हुन्छ भन्नुभएको थियो। तर प्रधानमन्त्रीले उहाँलाई नै राख्न चाहनुभएको छ, औपचारिक निर्णय हुन बाँकी छ तर उहाँ महान्यायाधिवक्ता हुने निश्चित हो,’ प्रधानमन्त्रीनिकट स्रोतले  भन्यो।

सरकारको कानुनी सल्लाहकार महान्यायाधिवक्ता प्रधानमन्त्रीको सिफारिसमा राष्ट्रपतिले नियुक्त गर्ने संवैधानिक व्यवस्था छ। यसअघिका महान्यायाधिवक्ता डा। दीनमणि पोखरेलले सरकार परिवर्तन भएसँगै राजीनामा दिइसकेका छन्। तत्कालीन प्रधानमन्त्री पुष्पकमल दाहाल ‘प्रचण्ड’को सिफारिसमा नियुक्त भएका पोखरेलले आइतबार नयाँ प्रधानमन्त्री नियुक्त भएसँगै राजीनामा दिएका थिए।

राष्ट्रपतिले उनको राजीनामा स्वीकृत गरिसकेका छन्।

बडाल यसअघि ओली प्रधानमन्त्री हुँदा २०७७ चैत ६ गते पहिलोपटक महान्यायाधिवक्ता नियुक्त भएका थिए। तर सर्वोच्च अदालतको परमादेशले ओली सरकार ढलेर शेरबहादुर देउवा प्रधानमन्त्री नियुक्त भएपछि बडालले पनि राजीनामा दिएका थिए। २०७८ असार २९ गते राजीनामा दिएका बडालले पहिलो कार्यकालमा करिब चार महिना मात्रै काम गर्न पाएका थिए।

उनको पहिलो कार्यकाल संसदमा प्रधानमन्त्री ओलीले गरेको संसद विघटनको बचाउ गर्दै बितेको थियो। ओलीले पहिलोपटक संसद विघटन गर्दा एमाले नेतासमेत रहेका वरिष्ठ अधिवक्ता अग्नि खरेल महान्यायाधिवक्ता थिए। तर उनले बीचैमा राजीनामा दिएपछि ओलीले बडाललाई महान्यायाधिवक्ता बनाएका थिए।

बडाल हालको सत्ता गठबन्धन निर्माणका क्रममा पनि सक्रिय थिए। असार १७ गते राति काठमाडौँको चपलीमा कांग्रेस र एमालेबीच सत्ता सहकार्य गर्नेबारे सहमति गर्दा पनि बडाल उपस्थित थिए।