काठमाडौं ४ माघ । बलिउड अभिनेता सैफ अली खानलाई चक्कु प्रहार गरेको आरोपमा मुम्बईमा एकजनालाई प्रहरीले पक्राउ गरेको छ। बिहीबार सबेरै उनीमाथि आफ्नै घरमा चक्कु प्रहार भएको थियो।

खान अस्पतालमा छन्। उनको शल्यक्रिया गरिएको छ।

आक्रमणकारी भाग्दै गरेको सीसीटीभी फुटेजमा देखिएको थियो। तर, पक्राउ परेका व्यक्ति उनै हुन कि होइनन्, प्रहरीले खुलाएको छैन।

प्रहरीले आक्रमणकारीको खोजीका लागि १० वटा टोली बनाएको थियो।

प्रहरीले खानको बच्चा स्याहार्ने महिलाको बयान लिएको छ। उनको भनाइ अनुसार राति बाथरुमछेउमा उनले एक छाया देखिन्। त्यो व्यक्ति एक हातमा काठको औजार र अर्को हातमा धारिलो हतियार लिएर देखा पर्‍यो।

आक्रमणकारी हल्ला नगर्न र एक करोड रुपैयाँ दिन धम्क्यायो। जसका कारण धकेलाधकेल भयो र त महिला घाइते भइन्।

त्यतिबेलै खान र उनकी पत्नी करिना कपुर हल्ला सुनेर कोठाभित्र पसे। उसले खानलाई धारिलो हतियार प्रहार गरेर भागेको बयान ती महिलाले दिएकी छन्। एजेन्सी