सप्तरी, १८ चैत । संघीय समाजवादी फोरम नेपालका अध्यक्ष उपेन्द्र यादवले नेपालमा भारतको सहकार्य आवश्यक रहेको बताउनुभएको छ ।

संघीय प्रेस फोरम सप्तरीले आइतबार राजविराजमा आयोजना गरेको पत्रकार सम्मेलनमा बोल्दै अध्यक्ष यादवले सो कुरा बताउँदै नेपालको विकासका लागि भारतलाई विकासको पार्टनरको रुपमा सम्झनु पर्ने बिचार व्यक्त गर्नुभयो । भारत तथा चीन जस्ता दुई ठूला छिमेकी मुलुकसित आपसी समझदारी कायम गरेर विकासको क्षेत्रमा अघि बढ्नु नेपालका लागि हितकर हुने उहाँको धारणा छ ।

सोही पत्रकार सम्मेलनमा अध्यक्ष यादवले संघीयताले देश समृद्ध हुने बताउँदै अब नेपालमा संघीयता बाहेकको विकल्प नरेहको बताउनुभयो । उहाँले मुलुकमा संघीयता समस्या नभएर समाधान हो भन्दै यसलाई बलियो बनाउनु पर्नेमा जोड समेत दिनुभयो ।

यता अधिकार सम्पन्न प्रदेश निर्माणका लागि प्रदेश सरकारलाई आफ्नै कानुन बनाउने अधिकार दिनुपर्ने माँग गर्दै अनिमात्र प्रदेश विकसीत र प्रगतिको तर्फ अगाडी बढ्ने उहाँले जिकिर गर्नुभयो । संविधान संशोधन वा कानुन बनाएर भएपनि प्रदेश सरकारलाई अधिकार, शक्ति र श्रोत प्रदान गर्नु पर्ने उहाँले सुझाव दिँदै अहिलेको प्रदेश सरकार त्रिशंकु जस्तो माथी जान नसक्ने र तल झर्न नसक्ने अवस्थामा रहेको जिकिर गर्नुभयो ।

उहाँले जनसंख्या तथा मानव विकास सूचकांकका आधारमा प्रदेशमा बजेट व्यवस्था गर्नु पर्ने बताउँदै सुरक्षा निकाय तथा कर्मचारी अझै पनि प्रदेश मातहत नआएकोले अब पनि केन्द्र सरकारले पुरानो मानसिकता पालेर काम नचल्ने उल्लेख गर्नुभयो ।

यस्तै युरोपेली युनियनले हालै सार्वजनिक गरेका निर्वाचन पर्यवेक्षण प्रतिवेदनलाई सार्थक बताउँदै अध्यक्ष यादवले बरु सरकारले त्यसका बिरुद्ध विज्ञप्ति निकालेर कुटनीतिक रुपमा असफलता प्रदर्शन गरेको टिप्पणी समेत गर्नुभयो । यस्तै संबिधान संशोधन तथा आफूहरुले उठाएका मुद्दा संबोधनको ग्यारेण्टी नभईकन यथास्थितिमा सरकारमा जान नसकिने उहाँले जवाफ दिनुभयो ।