काठमाडौं, १८ चैत । सार्वजनिक सवारी साधनले अबदेखि गाडीमा गीत बजाए वापत अनिवार्य रुपमा शुल्क तिर्नुपर्ने भएको छ। प्रतिलिपि अधिकार ऐन अनुसार उनीहरुलाई रोयल्टीको दायरामा ल्याइएको हो।

यातायात व्यवस्था विभागका अनुसार, अब यातायात नवीकरण गर्नको लागि पहिले संगीत रोयल्टी चुक्ता गरेको प्रमाणपत्र बुझाउनु पर्नेछ । नेपाल संगीत उद्योग संघको पहलमा आइतबारदेखि यस्तो प्रावधान लागू गरिएको हो।

विभागका अनुसार, ठूला बसले वार्षिक २ हजार तथा मिनीबसले १४ सय रुपैयाँ रोयल्टी बुझाउनुपर्ने हुन्छ। माइक्रोबस र ट्याक्सीलाई एक हजार रुपैयाँ तोकिएको छ। यस्तै, ट्रकलाई १२ सय तथा भ्यानलाई ९ सय रुपैयाँ निर्धारण गरिएको छ।

यातायात व्यवस्थापन कार्यविधि निर्देशिका २०६० परिमार्जन गरी यस्तो व्यवस्था लागू गरिएको यातायात व्यवस्था विभागका महानिर्देशक रुपनारायण भट्टराईले बताए। प्रतिलिपि अधिकार ऐन अनुसार कुनै पनि गीत(संगीत सार्वजनिक स्थानमा बजाउँदा रोयल्टी तिर्नुपर्ने प्रावधान छ।

यो प्रावधानले कलाकारहरुलाई ठूलो राहत पुग्ने प्रस्तोता समाज नेपाल संस्थाका अध्यक्ष तथा लोकगायक तुलसी पराजुली बताउँछन्। यदि सबै सार्वजनिक यातायातले संगीत रोयल्टी बुझाएमा वार्षिक ३० करोड रुपैयाँ जम्मा हुनेछ।

सवारी साधनले गीत बजाए नबजाएको आफुहरुले अनुगमन गर्ने पराजुलीले बताए । गीत नबजाउने सवारीसाधनले रोयल्टी तिर्नु नपर्ने उनले बताए ।

त्यसैगरी निजी सवारी साधनले पनि रोयल्टी तिर्नुपर्ने छैन।