नयाँ दिल्ली, २२ चैत । नेपाल मामिला जानकार भारतीय प्रोफेसर एसडी मुनीले प्रधानमन्त्री केपी शर्मा ओलीको भारत भ्रमण दुई देशबीचको तिक्तता कमी गर्ने उपयुक्त सयम भएको बताएका छन् ।

प्रधानमन्त्री ओलीको भारत भ्रमणको पूर्वसन्ध्यामा एबीसी टेलिभिजनका विशेष सम्वाददाता अनन्त अनुरागसँग नयाँ दिल्लीमा कुरा गर्दै प्रो. मुनीले प्रधानमन्त्री ओलीको नयाँ दिल्ली भ्रमणलाई नेपाल–भारत सम्बन्ध सुधारको गतिलो अस्त्रको रुपमा लिन भारतीय संस्थापन पक्षलाई सुझाव पनि दिएका छन् ।

मुनीले नेपाल–भारत सम्बन्धमा कुनै पनि दरार आउन नदिन दुवै देश सजग बन्नुपर्ने बताए । प्रो. मुनीले भारतीय नाकाबन्दी र संविधान स्वीकार नगर्नु भारतीय संस्थापन पक्षको कमजोरी रहेको टिप्पणी गरे ।

नेपाल जानकार समेत रहेका मुनिले अबका दिनमा भारत सरकारले सम्बन्धमा दरार ल्याउने कुनै पनि कार्य नगरी स्वतन्त्र राष्ट्रसँग असल छिमेकी व्यवहार देखाउन सुझाव दिए ।

पछिल्लो समय भारतले छिमेकीसँगको व्यवहारमा सुधार ल्याउने संकेत देखाएकोले अबका दिनमा कुनै पनि तिक्तता दुवै देशका लागि हितकर नहुने बताए । दुवै देशका जनताबीच सुमधुर सम्बन्ध हुँदै आए पनि राजनीतिक नेतृत्वको गलत कदमका कारण सम्बन्धमा उतार चढाव आउने गरेको चर्चा गर्दै उनले एकले अर्काको विश्वास जित्नेतर्फ कार्य गर्न सल्लाह दिए ।

मुनीले बिहीबार बिहान ट्वीट गर्दै प्रधानमन्त्री केपी शर्मा ओलीको भारत भ्रमण भारतीय कुटनीतिको परीक्षण भएको बताएकाका थिए ।
प्रोफेसर मुनीले ट्वीटमा भारतको ध्यान ओलीको राष्ट्रवादी प्रोफाइल कम गर्न र नेपाललाई चिनिया राजनीतिक समर्थनबाट बाहिर तान्नेमा केन्द्रित हुने पनि दाबी गरेका थिए ।

भारतीय कुटनीति सफल हुन्छ या हुँदैन भन्ने विषय भने ओली नेपाल फर्केपछि थाहा उनको भनाइ थियो ।