ताप्लेजुङ । नेपाल कम्युनिस्ट पार्टी (एमाले)का युवा नेता क्षितिज थेवे ताप्लेजुङबाट प्रतिनिधिसभा सदस्यमा निर्वाचित भएका छन्। उनले नेपाली कांग्रेसका गजेन्द्रप्रसाद तुम्याङ लिम्बूलाई पराजित गर्दै संसदको यात्रा तय गरेका हुन्।

शनिबार सम्पन्न मतगणनाको अन्तिम परिणामअनुसार थेवेले १३ हजार ९६२ मत प्राप्त गरे भने उनका प्रतिस्पर्धी लिम्बूले ११ हजार ७११ मत पाए।

उनको जितसँगै थेवे परिवारको राजनीतिक विरासत निरन्तरता पाएको छ। उनकी आमा उर्मिला थेवे केही महिनाअघिसम्म प्रतिनिधिसभा सदस्य थिइन्। उनी २०७९ सालको निर्वाचनमा समानुपातिक प्रणालीबाट सांसद बनेकी थिइन् र जेन–जी आन्दोलनपछि प्रतिनिधिसभा विघटन हुनुअघिसम्म सांसदको जिम्मेवारीमा थिइन्।

यसअघि उनका बुवा भूपेन्द्र थेवे २०७० सालमा भएको दोस्रो संविधानसभा निर्वाचनमा ताप्लेजुङबाट संविधानसभा सदस्यमा निर्वाचित भएका थिए।

२०७४ सालको प्रतिनिधिसभा निर्वाचनमा भूपेन्द्र थेवे पनि उम्मेदवारका आकांक्षी थिए तर उक्त समयमा पार्टीबाट योगेश भट्टराईले टिकट पाएका थिए। यसपटक भने भट्टराईले टिकट नपाएपछि क्षितिज थेवेलाई उम्मेदवार बनाइएको थियो।

पार्टीले दिएको अवसरलाई सदुपयोग गर्दै क्षितिज थेवे चुनाव जितेर प्रतिनिधिसभामा प्रवेश गर्न सफल भएका छन्।