बुटवल, २५ चैत्र । प्रदेश नम्बर ५ को प्रदेशसभामा प्रदेश सरकारको पहिलो निती तथा कार्यक्रम प्रस्तुत भएको छ ।
आज बसेको प्रदेशसभाको बैठकमा ५ नम्बर प्रदेश प्रमुख उमाकान्त झाले सरकारको निती तथा कार्यक्रम प्रस्तुत गर्नुभयो । सरकारले तयार पारेको ७५ बुंदे निती तथा कार्यक्रम प्रस्तुत गर्दै प्रदेश प्रमुख झाले संविधानले प्रदान गरेका कार्यहरु आरम्भ गर्नयतिवेला कानूनहरु र स्रोत तथा साधनको अपर्याप्तता रहेको बताउनुभयो ।

उहांले संविधानतः प्रदेश अन्तरगत आउनुपर्ने प्रशासन र विकासका सांगठनिक संरचनाहरु र आवश्यक जनशक्ति अहिलेसम्म केन्द्रबाट प्रदेशलाई हस्तान्तरण भइनसकेको बताउंदै संगठन संरचना र जनशक्तिको अभावमा संविधान प्रदत्त जिम्मेवारी पूरा गर्ने कुरामा थुप्रै कठिनाईहरु रहेका टिप्पणी गर्नुभयो ।

प्रदेश प्रमुख झाले प्रस्तुत गर्नुभएको कार्यक्रममा प्रदेशको समग्र विकासमा कृषि क्षेत्रको विकासलाई उच्च प्राथमिकता दिइने उल्लेख गर्दै प्रदेशमा वस्तु र सेवा उद्योगको विकासको सम्भावना अत्यन्त राम्रो रहेको बताईएको छ । प्रदेशको समृद्धिको आधार पर्यटन व्यवसाय बन्ने निश्चित रहेको ठहर गर्दै निती तथा कार्यक्रममा प्रदेश सरकारले कृषि, उद्योग र पर्यटनका माध्यमबाट समग्र आर्थिक सामाजिक विकास रणनीति अवलम्वन गर्ने बताईएको छ ।

एबिसी न्युजसंग कुरा गर्दै नेपाली कांग्रेसका प्रमुख सचेतक सुरेन्द्र हमालले प्रदेश सरकारले प्रस्तुत गरेको निती तथा कार्यक्रममा प्रतिपक्षहरुसंग सल्लाह नै नगरि तयार पारिएको भन्दै गुनासो गर्नुभयो ।

सरकारले प्रस्तुत गरेको निती तथा कार्यक्रमको सत्तारुढ दलकै सांसदले बिरोध गरेकाछन् । माओबादी केन्द्रका सांसद ईन्द्र प्रसाद खरेलले निती तथा कार्यक्रम अमुर्त र पक्षपातपूर्ण भएको टिप्पणी गर्नुभएको छ ।

प्रदेश सभाको आजको दोस्रो बैठकमा प्रदेशसभाले प्रदेश प्रमुखलाई धन्यबाद ज्ञापन गरेको छ । बैठकमा प्रदशे प्रमुख शंकर पोखरेलले सरकारको निती तथा कार्यक्रम टेवल गर्नुभएको थियो । निती तथा कार्यक्रममाथी भोलिबाट छलफल सुरु हुने संसद सचिवालयले जनाएको छ ।