काठमाडौं, ८ जेठ । काठमाण्डौमा आजदेखि ‘काभा महिला भलिबल च्याम्पियनसिप २०२६’ शुरु हुँदैछ । प्रतियोगिताको उद्घाटन खेल त्रिपुरेश्वरमा रहेको कभर्ड हलमा बिहान ११ बजे इरान र बंगलादेशबीच हुनेछ । औपचारिक उद्घाटन दिउँसो २ बजे आयोजना गरिने आयोजक नेपाल भलिबल सङ्घले जनाएको छ ।

त्यसपछि दिउँसो साढे ३ बजे नेपालले भारतसँग प्रतिस्पर्धा गर्नेछ । प्रतियोगिताको समूह ‘ए’ मा नेपाल, भारत, किर्गिस्तान र मालदिभ्स छन् । समूह ‘बी’ मा इरान, काजकिस्तान, श्रीलङ्का र बङ्गलादेश रहेका छन् । एफआईबीबीको आधिकारिक वरीयतामा समावेश प्रतियोगिताले नेपाललाई अन्तर्राष्ट्रिय र्‍याङ्किङमा सुधार गर्ने अवसर दिनेछ । काभा च्याम्पियनसिपमा नेपाल निरुता ठगुन्नाको कप्तानीमा मैदान उत्रिनेछ ।

१४ सदस्यीय टोलीमा ६ युवा खेलाडीले पहिलो पटक स्थान बनाएका छन् । रिमा कुँवरले राष्ट्रिय टोलीमा पुनरागमन गरेकी छन् । त्यस्तै टोली उषा भण्डारी, मिना सुनार, सलिना बुढामगर, कामना विष्ट, सलिना श्रेष्ठ, बसन्ती साउद, सुमित्रा रेग्मी, सुनिता खत्री, एलिशा मानन्धर, प्रगति नाथ, जसना महतो र शान्तिकला तामाङ रहेका छन् । सन् २०१९ र २०२२ को उपाधि विजेता नेपाललाई तेस्रो पटक उपाधि जित्ने अवसर छ । नेपालले घरेलु कोर्टमै ट्रफी भित्र्याउने लक्ष्य लिएको छ ।