काठमाडौँ, १७ जेठ । राष्ट्रिय प्रजातन्त्र पार्टी ९राप्रपा० भित्र देखिएको आन्तरिक असन्तुष्टि र विवादका बीच पार्टीका तीन पूर्वअध्यक्षहरूले पार्टीको भविष्य उज्ज्वल रहेको भन्दै कार्यकर्तालाई एकजुट रहन आग्रह गरेका छन् ।

राप्रपाका पूर्वअध्यक्षहरू पशुपति शमशेर राणा, प्रकाश चन्द्र लोहनी र कमल थापाले शनिबार संयुक्त वक्तव्य जारी गर्दै पार्टी संगठनलाई थप सुदृढ बनाउँदै अघि बढ्न कार्यकर्तालाई आह्वान गरेका हुन् ।

वक्तव्यमा उनीहरूले हालको परिस्थितिबाट विचलित नभई संगठन निर्माणमा सक्रिय हुन आग्रह गर्दै कुनै पनि ‘आत्मघाती कदम’ नचाल्न विशेष अनुरोध गरेका छन् । साथै, आगामी महाधिवेशनमार्फत पार्टीभित्रका समस्या, विकृति र चुनौतीहरूको समाधान हुने विश्वास व्यक्त गरिएको छ।

पूर्वअध्यक्षहरूले हालैको निर्वाचन परिणाम अपेक्षाअनुसार नआए पनि उचित रणनीति र एकताका साथ अघि बढे छोटो समयमै पार्टीले उल्लेखनीय सफलता हासिल गर्न सक्ने दाबी गरेका छन् । उनीहरूले हिन्दूराष्ट्र र राजसंस्थाको पुनर्स्थापनासहित पार्टीको मूल एजेन्डा अझ सशक्त रूपमा अघि बढाउने प्रतिबद्धता पनि दोहोर्याएका छन् ।

आगामी जेठ अन्तिम साता बस्ने केन्द्रीय कार्यसमितिको बैठकबाट महाधिवेशनको मिति तय गरिने तयारी भइरहेको जनाइएको छ।