काठमाडौं — फिफा विश्वकप २०२६ मा सोमबार राति र मंगलबार बिहान भएका खेलहरूले फुटबल समर्थकलाई रोमाञ्चित बनाएका छन्। अर्जेन्टिनाका कप्तान लियोनल मेसीले विश्वकप इतिहासकै सर्वाधिक गोलकर्ताको कीर्तिमान बनाउँदा नर्वेका एर्लिङ हालान्ड र फ्रान्सका किलियन एम्बाप्पेले पनि दोहोरो गोल गर्दै आफ्नो टोलीलाई जित दिलाएका छन्। यता अल्जेरियाले जोर्डनलाई पराजित गर्दै नकआउट चरणको आशा जीवित राखेको छ।
मेसीले तोडे क्लोजको कीर्तिमान, अर्जेन्टिना अन्तिम ३२ मा
डालसमा भएको समूह ‘जे’ को खेलमा अर्जेन्टिनाले अस्ट्रियालाई २–० ले पराजित गर्दै नकआउट चरणमा स्थान सुरक्षित गरेको छ।
खेलका दुवै गोल कप्तान लियोनल मेसीले गरे। उनले पहिलो हाफको ३८औँ मिनेटमा गोल गर्दै जर्मनीका मिरोस्लाभ क्लोजको १६ गोलको कीर्तिमान तोडे। त्यसपछि इन्जुरी समयमा अर्को गोल थप्दै विश्वकपमा आफ्नो गोल संख्या १८ पुर्याए।
खेलमा मेसीले सुरुमै पेनाल्टी गुमाएका थिए। तर त्यसको प्रभाव हटाउँदै उनले टोलीलाई जित दिलाए। लगातार दुई जितपछि अर्जेन्टिना समूहको शीर्ष स्थानमा रहँदै अन्तिम ३२ मा पुगेको छ।
खेलपछि प्रशिक्षक लियोनल स्कालोनीले भने, “मेसीबारे भन्न अब शब्द नै बाँकी छैन। उनी सक्रिय हुँदा पूरै टोली सक्रिय हुन्छ।”
हालान्डको दोहोरो प्रहार, नर्वे अन्तिम ३२ मा
न्युजर्सीमा भएको समूह ‘आई’ को खेलमा नर्वेले अफ्रिकी च्याम्पियन सेनेगललाई ३–२ ले पराजित गर्दै अन्तिम ३२ मा स्थान बनाएको छ।
एर्लिङ हालान्डले दुई गोल गर्दै प्रतियोगितामा आफ्नो गोल संख्या चार पुर्याए। पहिलो गोल ४८औँ मिनेटमा मार्टिन ओडेगार्डको उत्कृष्ट पासमा आएको थियो भने दोस्रो गोल ५७औँ मिनेटमा सेनेगलका कप्तान कालिडु कुलिबालीको गल्तीको फाइदा उठाउँदै गरेका थिए।
मार्कस होल्मग्रेन पेडरसनले नर्वेका लागि अर्को गोल गरे। सेनेगलका इस्माइला सारले दुई गोल फर्काए पनि हार टार्न सकेनन्।
यो जितसँगै नर्वे र फ्रान्स दुवै समूह ‘आई’ मा ६–६ अंकसहित शीर्ष दुई स्थानमा पुगेका छन्। अब समूह विजेताको टुंगो हालान्ड र एम्बाप्पेबीचको प्रतिक्षित भिडन्तबाट लाग्नेछ।
एम्बाप्पेको दोहोरो गोल, फ्रान्सको सहज विजय
फिलाडेल्फियामा मेघगर्जन र चट्याङका कारण दुई घण्टाभन्दा बढी रोकिएको खेलमा फ्रान्सले इराकलाई ३–० ले हराएको छ।
कप्तान किलियन एम्बाप्पेले खेलमा दुई गोल गरे। उनले यस विश्वकपमा चार गोल पूरा गरेका छन् भने करियरको विश्वकप गोल संख्या १६ पुर्याएका छन्।
एम्बाप्पेले जर्मनीका मिरोस्लाभ क्लोजको १६ गोलको कीर्तिमान बराबरी गरेका छन्। यद्यपि मेसी १८ गोलसहित शीर्ष स्थानमा छन्।
फ्रान्सका लागि अर्को गोल उस्मान डेम्बेलेले गरे। लगातार दोस्रो जितसँगै फ्रान्स पनि नकआउट चरणमा पुगेको छ।
अब विश्व फुटबलका दुई सुपरस्टार एम्बाप्पे र हालान्डबीच समूह विजेताको लडाइँ हुने भएको छ, जसलाई यस विश्वकपको अहिलेसम्मकै सबैभन्दा ठूलो खेल मानिएको छ।
अल्जेरियाको पुनरागमन, जोर्डन प्रतियोगिताबाट बाहिरियो
समूह ‘जे’ अन्तर्गत अर्को खेलमा अल्जेरियाले जोर्डनलाई २–१ ले पराजित गरेको छ।
पहिलो हाफमा निजार अल-राशदानको गोलबाट जोर्डनले अग्रता लिए पनि दोस्रो हाफमा नाधिर बेनबुआली र अमिन गुइरीले गोल गर्दै अल्जेरियालाई जित दिलाए।
अर्जेन्टिनासँग पहिलो खेल ३–० ले हारेको अल्जेरियाले यस जितसँगै नकआउट चरण पुग्ने सम्भावना कायम राखेको छ।
पराजित जोर्डन भने लगातार दोस्रो हारसँगै प्रतियोगिताबाट बाहिरिएको छ।
हालान्ड बनाम एम्बाप्पे : विश्वकपको सबैभन्दा ठूलो भिडन्त
विश्वकपको समूह चरण अन्त्यतिर पुग्दा सबैको ध्यान अब नर्वे र फ्रान्सबीच हुने खेलमा केन्द्रित भएको छ। एर्लिङ हालान्ड र किलियन एम्बाप्पे दुवै उत्कृष्ट लयमा छन्।
हालान्डले दुई खेलमा चार गोल गरेका छन् भने एम्बाप्पेको खातामा पनि चार गोल छ। दुवै टोलीले नकआउट चरण सुनिश्चित गरिसकेका छन्, तर समूह विजेता बन्ने टोलीले अपेक्षाकृत सहज नकआउट यात्रा पाउने भएकाले शुक्रबारको खेल निकै महत्वपूर्ण मानिएको छ।
मेसीले विश्वकप गोलको नयाँ कीर्तिमान बनाएको दिन हालान्ड र एम्बाप्पेले पनि आफ्नो दाबेदारी बलियो बनाएका छन्। जसले गर्दा विश्वकप २०२६ मा ‘गोल्डेन बुट’ को दौड झन् रोमाञ्चक बनेको छ।
प्रतिक्रिया दिनुहोस्