काठमाडौं १० असार । फिफा विश्वकप–२०२६ अन्तर्गत समूह ‘के’को खेलमा कोलम्बियाले कङ्गोलाई १–० गोलले पराजित गर्दै एक खेल बाँकी रहँदै अन्तिम ३२ मा स्थान सुरक्षित गरेको छ। अमेरिकामा आज बिहान सम्पन्न खेलमा कोलम्बियाको जितका लागि डानियल मुनोजले निर्णायक गोल गरे। उनले खेलको ७६औँ मिनेटमा जुआन क्विन्टेरोको उत्कृष्ट पासलाई सदुपयोग गर्दै गोल गरेका थिए। मुनोजको उक्त गोल नै खेलको एकमात्र गोल बन्यो र कोलम्बियालाई महत्त्वपूर्ण तीन अङ्क दिलायो।

जितसँगै कोलम्बियाले दुई खेलबाट शतप्रतिशत नतिजासहित ६ अङ्क जोडेको छ। अब कोलम्बियाले समूह चरणको अन्तिम खेलमा पोर्चुगलको सामना गर्नेछ। पोर्चुगलले आफ्नो दोस्रो खेलमा उज्बेकिस्तानलाई ५–० गोलले पराजित गर्दै बलियो लय कायम राखेको छ। यता, कङ्गो भने दुई खेलबाट एक अङ्कमै सीमित रहँदै समूह चरणबाट बाहिरिने जोखिममा परेको छ।