काठमाडौं । मुलुकको पछिल्लो राजनीतिक परिस्थितिका माझ ऐतिहासिक केन्द्र मानिने मोरङको विराटनगरस्थित कोइराला निवासमा शीर्ष नेताहरूबीच महत्त्वपूर्ण राजनीतिक मन्थन भएको छ। नेपाल कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ र सहसंयोजक माधवकुमार नेपालले नेपाली कांग्रेसका प्रभावशाली नेता डा. शेखर कोइरालासँग सामूहिक भेटवार्ता गरेका हुन्।

विगतको राजनीतिक आन्दोलनका क्रममा क्षति ब्यहोरेको कोइराला निवासको ऐतिहासिक गिरिजाप्रसाद कोइरालाको बैठक कक्षमा तीन नेताबीच झन्डै ४५ मिनेटसम्म सघन छलफल चलेको थियो।

समसामयिक राजनीति र शक्ति सन्तुलनमा केन्द्रित छलफल

नेता कोइरालाको सचिवालयले दिएको जानकारी अनुसार पूर्वप्रधानमन्त्रीद्वय दाहाल र नेपाल शुक्रबार बिहान कोइराला निवास पुगेका थिए।भेटघाटका क्रममा नेताहरूबीच देशको समसामयिक राजनीतिक अवस्था, विकसित नयाँ राजनीतिक घटनाक्रम र शक्ति समीकरणका विविध आयामबारे विस्तृत कुराकानी भएको छ।

बैठक सकिएर निस्कने क्रममा कम्युनिस्ट पार्टीका संयोजक प्रचण्डले पुराना दिनहरू स्मरण गर्दै “गिरिजा बाबुकै बैठक कक्ष रहेछ होइन ?”भनी सोधेका थिए भने नेता कोइरालाले “त्यही हो” भन्दै जवाफ फर्काएका थिए। राजनीतिक रूपमा तरंग पैदा गरिरहेको यस भेटघाटलाई आम वृत्तमा चासोका साथ हेरिएको छ।

कांग्रेस महामन्त्री घिमिरेसँग पनि कोइरालाको संवाद

कम्युनिस्ट पार्टीका शीर्ष नेताहरूसँगको भेटवार्ता अघि/पछिको समयमा शुक्रबार नै नेपाली कांग्रेसका महामन्त्री गुरूराज घिमिरेले पनि नेता डा. शेखर कोइरालासँग छुट्टै भेटवार्ता गरेका थिए।

पार्टीको आन्तरिक व्यवस्थापनमा जोड:

कोइराला र घिमिरेबीच मुख्यगरी नेपाली कांग्रेसभित्र देखिएको आन्तरिक विवाद समाधान गर्ने, पार्टीका विभिन्न पक्षहरूबीच आपसी समझदारी कायम गर्ने र आगामी १५ औं महाधिवेशनमा सबै पक्षको न्यायोचित सहभागिता सुनिश्चित गर्ने विषयमा केन्द्रित रहेर छलफल भएको बताइएको छ।

एकातिर प्रमुख प्रतिपक्षी र अन्य दलका नेताहरूसँगको संवाद र अर्कोतिर आफ्नै पार्टीभित्रको आन्तरिक रणनीति तय गर्ने कार्यले विराटनगरमा राजनीतिक सरगर्मी निकै बढाएको छ।