काठमाडौँ – नेकपाका सहसंयोजक तथा पूर्वप्रधानमन्त्री माधवकुमार नेपालले कम्युनिस्ट आन्दोलनको वर्तमान अवस्थाप्रति गम्भीर चिन्ता व्यक्त गर्दै अब केवल गफ गरेर नहुने चेतावनी दिएका छन्। जननेता मदन भण्डारीको ७५औँ जन्मजयन्तीको अवसरमा काठमाडौँमा आयोजित विचार गोष्ठीलाई सम्बोधन गर्दै उनले कम्युनिस्ट शक्तिहरूले आफ्नो कमजोरीको निर्मम समीक्षा गर्नुपर्नेमा जोड दिए।

‘आत्मसमीक्षाको विकल्प छैन’

नेता नेपालले कम्युनिस्ट पार्टीहरूले जनताको बदलिँदो मनोविज्ञानलाई बुझ्न नसकेको वा पार्टीभित्र विकृतिहरू मौलाएको भन्दै यस विषयमा गहिरो आत्ममन्थन आवश्यक रहेको बताए। उनले प्रश्न गरे, “हामीले जनताको बदलिंदो मनोविज्ञानलाई बुझ्न सकेनौं, या हामीमा के के विकृति आए? यसको आत्मसमीक्षा गरौं”।

उनका अनुसार, नेपालका सम्पूर्ण कम्युनिस्ट घटकहरूले एकजुट हुने हो भने विगतका गल्तीहरू स्वीकार गर्दै अगाडि बढ्नुको विकल्प छैन।

‘व्यक्तिवादी प्रवृत्तिले आन्दोलन कमजोर’

आन्दोलन कमजोर हुनुको कारण सिद्धान्तको अभावभन्दा पनि नेताहरूमा देखिएको ‘मै हुँ’ भन्ने अहङ्कार र भ्रष्टाचारजन्य प्रवृत्ति रहेको उनको ठम्याइ छ। उनले भने, “विचार, सिद्धान्त या हाम्रो व्यक्तिवादीताले रु मै हुँ भन्ने प्रवृत्तिले, भ्रष्टाचार गर्ने प्रवृत्तिले रु के के कारणले हो रु”।

मदन भण्डारीको स्मरण र एकतामा जोड

मदन भण्डारीको विचारलाई स्मरण गर्दै उनले मदन भण्डारीले सधैँ वास्तविकताको धरातलमा रहेर चुनौतीको सामना गर्ने आँट गर्नुपर्छ भनी सिकाएको बताए। उनले थपे, “मदन भण्डारीले भन्नुहुन्थ्यो, कुरा गरेर मात्रै चिउरा भिज्नेवाला छैन। हामीले अहिले मिल्नसक्ने कुरामा मिलेर अघि बढ्नुपर्ने छ”।

कार्यक्रममा उनले ‘जनताको बहुदलीय जनवाद’ (जबज) का कतिपय पक्षहरू आजको युगमा पनि उत्तिकै सान्दर्भिक रहेको र तिनलाई ग्रहण गर्नुपर्ने आवश्यकता औँल्याए।