काठमाडौं, ७ साउन । प्रधानमन्त्री बालेन शाहले सरकार गठनको प्रारम्भिक चरणमा अपनाएको कूटनीतिक दूरीको नीतिबाट पछि हट्दै परराष्ट्र मन्त्रालयको औपचारिक संयन्त्रभन्दा बाहिरबाट कूटनीतिक पहल अघि बढाएको दाबी गरिएको छ।

स्रोतका अनुसार प्रधानमन्त्रीका प्रमुख सल्लाहकार कुमार बेन (व्यञ्जनकार) जुलाईको पहिलो साता भारत पुगेर भारतीय राष्ट्रिय सुरक्षा सल्लाहकार अजित डोभलसँग भेटवार्ता गरेका थिए। उक्त भेटबारे परराष्ट्र मन्त्रालयलाई औपचारिक जानकारी नदिइएको र छलफलको विषयसमेत मन्त्रालयलाई थाहा नभएको बताइएको छ।

यससँगै प्रधानमन्त्री शाहले काठमाडौंस्थित भारत र चीनका राजदूतसँग छुट्टाछुट्टै ‘वान–अन–वान’ भेटवार्ताको तयारी पनि थालेको दाबी गरिएको छ। परराष्ट्र मन्त्रालयका अनुसार यस विषयमा औपचारिक जानकारी नआएपछि मन्त्री शिशिर खनालले नै प्रमुख सल्लाहकार बेनसँग जानकारी लिएका थिए।

प्रधानमन्त्रीको यो परिवर्तनका पछाडि तीन मुख्य कारण उल्लेख गरिएको छ।

पहिलो, सत्तारूढ राष्ट्रिय स्वतन्त्र पार्टी (रास्वपा) र भारतसँगको सम्बन्ध तथा पार्टीभित्रको शक्ति सन्तुलन;

दोस्रो, भारतीय सञ्चारमाध्यममा सरकारबारे आएका नकारात्मक समाचार;

तेस्रो, सुकुम्बासी व्यवस्थापन, राहदानी छपाइलगायत विषयमा बढेको घरेलु आलोचना।

यस्तै, प्रधानमन्त्री शाहले आर्थिक क्षेत्रमा पनि सक्रियता बढाउँदै निजी क्षेत्रका उद्योगी–व्यवसायी, लगानीकर्ता तथा विभिन्न व्यावसायिक संघसंस्थासँग नियमित छलफल गरिरहेको उल्लेख गरिएको छ। ती अधिकांश छलफलमा अर्थमन्त्री वा अर्थ मन्त्रालयको प्रत्यक्ष संलग्नता नरहेको दाबी समाचारमा गरिएको छ।