काठमाडौं । काठमाडौं उपत्यकामा महिला तथा वृद्धवृद्धालाई लक्षित गरी सुनको सिक्री लुटपाट गर्दै आएको गिरोहका मुख्य सदस्य कर्मा तामाङलाई प्रहरीले गोली प्रहार गरी पक्राउ गरेको छ। घटनापछि प्रहरीले गिरोहका थप पाँच सदस्यलाई समेत नियन्त्रणमा लिएको छ।

जिल्ला प्रहरी परिसर काठमाडौंका अनुसार शनिबार राति बूढानीलकण्ठ नगरपालिका–१३ चुनिखेलमा सिक्री लुटपाट गरेर भाग्ने क्रममा कर्मा तामाङलाई नियन्त्रणमा लिन प्रहरीले गोली प्रहार गरेको थियो।

प्रारम्भिक अनुसन्धानमा कर्मा तामाङको नेतृत्वमा संगठित समूह नै उपत्यकाका विभिन्न स्थानमा लुटपाटमा सक्रिय रहेको खुलेको प्रहरीले जनाएको छ।

अनुसन्धानअनुसार गिरोहले बाटो सोध्ने बहाना बनाएर विशेषगरी महिला र वृद्धवृद्धालाई एकान्त स्थानमा रोक्ने, त्यसपछि सुनको सिक्री लुटेर फरार हुने गरेको पाइएको छ।

जिल्ला प्रहरी परिसर काठमाडौंका प्रवक्ता एसपी दानबहादुर थापाले घटनामा संलग्न गिरोहमाथि थप अनुसन्धान भइरहेको जानकारी दिएका छन्। प्रहरीले लुटपाटका अन्य घटनासँग पनि पक्राउ परेकाहरूको संलग्नता रहेको हुनसक्ने आशंकामा अनुसन्धान अगाडि बढाएको जनाएको छ।

Originally published on abcnews.com.np.