काठमाडौं । राष्ट्रिय ध्वजावाहक नेपाल वायुसेवा निगम (नेपाल एयरलाइन्स) ले पछिल्लो आर्थिक वर्ष २०८२/८३ मा यात्रु सेवा तथा टिकट बिक्रीबाट १७ अर्ब ३३ करोड रुपैयाँभन्दा बढी आम्दानी गरेको छ। अघिल्लो वर्षको तुलनामा करिब २ अर्ब रुपैयाँ आम्दानी बढे पनि निगमले ५६ अर्ब रुपैयाँभन्दा बढी ऋणमध्ये करिब २ अर्ब १२ करोड रुपैयाँ मात्रै किस्ता तिर्न सकेको छ।

निगमले सार्वजनिक गरेको तथ्यांकअनुसार गत आर्थिक वर्षमा आन्तरिक तथा अन्तर्राष्ट्रिय उडानमार्फत ५ लाख ७६ हजार ४२१ यात्रुलाई सेवा दिँदै १७ अर्ब ३३ करोड १५ लाख रुपैयाँ आम्दानी गरेको हो। ग्राउन्ड ह्यान्डलिङ सेवाबाट हुने करिब ५ अर्ब रुपैयाँ आम्दानी भने यो तथ्यांकमा समावेश गरिएको छैन।

अघिल्लो आर्थिक वर्ष २०८१/८२ मा निगमको टिकट बिक्री आम्दानी १५ अर्ब ३१ करोड रुपैयाँ थियो। यसपटक आम्दानी १३ प्रतिशतले बढे पनि ऋण व्यवस्थापनमा अपेक्षित सुधार हुन सकेको छैन।

गन्तव्यगत आम्दानीमा जापानको नारिता सबैभन्दा आकर्षक बजार बनेको छ। केवल ७ हजार २५८ यात्रु बोकेर निगमले ५ अर्ब ३२ करोड ९० लाख रुपैयाँ आम्दानी गरेको छ। भारतको दिल्लीमा भने सबैभन्दा धेरै १ लाख ५९ हजार यात्रुलाई सेवा दिँदै १ अर्ब ६७ करोड रुपैयाँ आम्दानी भएको छ।

त्यसैगरी दोहाबाट २ अर्ब ६८ करोड, दुबईबाट २ अर्ब ४७ करोड, क्वालालम्पुरबाट १ अर्ब ८ करोड र बैंककबाट १ अर्ब १ करोड रुपैयाँ आम्दानी भएको निगमले जनाएको छ।

आम्दानी बढे पनि निगमले अन्तर्राष्ट्रिय उडानका जहाज खरिद गर्दा लिएको ऋणमध्ये गत वर्ष कर्मचारी सञ्चय कोषलाई १ अर्ब ७२ करोड र नागरिक लगानी कोषलाई ४० करोड रुपैयाँ गरी जम्मा २ अर्ब १२ करोड रुपैयाँ मात्रै भुक्तानी गर्न सकेको छ। हाल निगममाथि दुवै संस्थाप्रति ५६ अर्ब रुपैयाँभन्दा बढी ऋण दायित्व रहेको छ।

निगमका अनुसार सञ्चालन खर्च अत्यधिक भएकाले आम्दानीको ठूलो हिस्सा जहाज सञ्चालन, मर्मतसम्भार र कर्मचारी खर्चमै जाने गरेको छ। निगमले प्रत्येक महिना करिब १४ करोड रुपैयाँ कर्मचारी तलबमा खर्च गर्ने गरेको छ।

यसबाहेक यसै वर्ष वाइडबडी जहाजहरूको सी–चेक तथा इन्जिन मर्मत गर्नुपर्ने भएकाले मात्रै १० देखि १२ अर्ब रुपैयाँ खर्च हुने अनुमान गरिएको छ। एउटा वाइडबडी जहाज अहिले इटालीमा सी–चेकमा रहेको छ भने अर्को जहाज पनि छिट्टै मर्मतका लागि पठाइने तयारी छ।

निगमका प्रवक्ता देवेन्द्र पुनले जहाज सञ्चालन र मर्मतसम्भारमा ठूलो खर्च हुने भएकाले आम्दानी बढे पनि ऋण तिर्न पर्याप्त स्रोत नपुगेको बताए। उनका अनुसार निगमले अतिरिक्त कर्मचारी सुविधा नदिई मुख्यतः जहाज सञ्चालनलाई प्राथमिकता दिइरहेको छ।

Originally published on abcnews.com.np.